Сёння раніцай бамбілі Кіеў. Выпусцілі шмат ракет, частку збілі, адна папала ў двор дзіцячага садка
Дым відаць у розных частках сталіцы Украіны.
Папярэдне вядома, што па горадзе было выпушчана 14 ракет. Некалькі з іх украінскія сілы СПА збілі на падлёце да горада.
Адна з ракет упала ў Шаўчэнкаўскім раёне горада, трапіўшы ў дзевяціпавярховік і разбурыўшы тры верхнія паверхі.
Загінуў адзін чалавек, ратавальнікі дасталі з-пад завалаў сямігадовую дзяўчынку. Імаверна, яе бацька загінуў, а маці прыціснула плітой. Таксама яшчэ некалькі чалавек знаходзяцца пад заваламі. Пазней ратавальнікі паведамілі, што параненыя пяць чалавек.
Яшчэ адна ракета разарвалася ў двары дзіцячага садка. На шчасце, уранку выхаднога дня там не было нікога.
Пракрамлёўскія тэлеграм-каналы паведамляюць, што ўдары па Кіеве нанеслі бамбардзіроўшчыкі расійскіх ВКС.
Паветраная трывога аб'яўлена па ўсёй тэрыторыі Украіны.