У Косаве на мяжы арыштавалі расійскую журналістку — яе падазраюць у працы на разведку
Улады Косава арыштавалі на мяжы расійскую журналістку Дар'ю Асламаву паводле падазрэння ў шпіянажы на карысць Расіі. Пра гэта паведаміў міністр унутраных спраў краіны Джэляль Швечла, піша Reuters.
«Многія краіны даказалі, што яна займалася шпіянажам на карысць расійскай ваеннай разведкі і дзейнічала пад выглядам журналісткі. Яна таксама ўдзельнічала ў вайне ў Украіне, распаўсюджваючы прапаганду ўварвання Расіі ва Украіну», — напісаў міністр.
Швечла сказаў, што ўладам Косава вядома пра дзейнасць Асламавай і пра тое, што ў некаторых краінах ёй забаронены ўезд.
Як паведаміў Швечла, спроба Асламавай пракрасціся ў Косава супадае з падзеямі на поўначы краіны і даказвае расійскі след і прапаганду, накіраваныя на дэстабілізацыю ў Косаве.
Швечла апублікаваў у Facebook фоты Асламавай з міністрам замежных спраў Расіі Сяргеем Лаўровым і з сірыйскім дыктатарам Башарам Асадам.