Тэлефонныя махляры выманілі ў пенсіянеркі 500 тысяч рублёў
У Гродне супрацоўнікі міліцыі затрымалі двух тэлефонных махляроў, якія забралі ў пенсіянеркі 534 тысячы рублёў у рознай валюце, паведамляе прэс-служба МУС.
Здарэнне адбылося яшчэ ў канцы жніўня. Тады 84-гадовая жыхарка Гродна аддала тэлефонным ашуканцам зберажэнні ўсёй сям'і.
Аднаго з кур'ераў супрацоўнікі міліцыі знайшлі цягам трох дзён, ім аказаўся 19-гадовы хлопец. Ён скрадзеныя грошы ўжо перавёў у біткойны. Таксама хлопец распавёў пра свайго 30-гадовага напарніка, які паспеў з'ехаць у Расію. Але на днях мужчына вярнуўся ў Беларусь і яго затрымалі.
Распачатая крымінальная справа за махлярства, здзейсненае ў асабліва буйным памеры. Паводле ч. 4 арт. 209 КК фігурантам пагражае да дзесяці гадоў пазбаўлення волі.