Людзей, што ўскладалі ў Маскве кветкі да мемарыяла загінулым у Дняпры, здаў паліцыі ўраджэнец Дняпра
Выданне SOTA піша, што рэдакцыя высветліла асобы трох сяброў руху SERB, якія напярэдадні, 17 студзеня, выклікалі паліцыю да помніка Лесі Украінцы ў Маскве, дзе ўзнік стыхійны мемарыял у памяць пра загінулых у выніку ракетнага ўдару па Дняпры. Адным з даносчыкаў аказаўся выхадзец з таго самага Дняпра.
Лідар SERB Ігар Бекетаў, вядомы таксама як Гоша Тарасевіч, нарадзіўся і вырас у Дняпры, скончыў там тэатральнае вучылішча. Пра Бекетава-Тарасевіча вядома, што ён здымаецца ў кіно ў ролях другога плана.
Разам з Бекетавым да помніка Лесі Украінцы прыходзілі Пётр Рыбакоў і Аляксандр Петрунько. Апошні ў 2014 годзе ўдзельнічаў у штурме абласной адміністрацыі Харкава, а ў 2017 годзе, як мяркуецца, абліў зялёнкай Аляксея Навальнага.
16 студзеня на Украінскім бульвары ў Маскве каля помніка паэтцы Лесі Украінцы з'явіліся кветкі і цацкі ў памяць аб загінулых у Дняпры ад расійскай ракеты дарослых і дзецях. Хтосьці прынёс да мемарыяла фатаграфію разбуранага дома.
Увечары 17 студзеня паліцыя затрымала каля помніка чатырох чалавек. Як паведамляў праваабарончы праект ОВД-Инфо, аднаму з затрыманых выставілі абвінавачванне ў дробным хуліганстве (арт. 20.1 КаАП). Адваката, які прыбыў да затрыманых, у аддзяленне паліцыі не пусцілі.