Ноччу расіяне атакавалі партовую інфраструктуру Адэсы. У нежылым гатэлі ўспыхнуў пажар
Ноччу Адэскую вобласць атакавалі 19 ударных дронаў, якія былі збітыя, і дзве звышгукавыя ракеты «Онікс», паведамляюць Сілы абароны поўдня.
Наступствы начной атакі на Адэсу. Фота: Сілы абароны поўдня
Па розных рэгіёнах запусцілі 12 «калібраў» са складанымі траекторыямі руху. Удар наносіўся ў тым ліку з падлодкі ў бухце Новарасійска.
11 «калібраў» збіта (па адным над Мікалаеўскай і Кіраваградскай абласцямі, пераважная большасць — над Адэскай вобласцю).
Істотныя пашкоджанні атрымаў марскі вакзал у Адэсе, у будынку прывакзальнай гасцініцы ўспыхнуў пажар.
«Оніксы» разбурылі збожжасховішчы.
У выніку падзення абломкаў пашкоджанні атрымалі складскія будынкі аднаго з прадпрыемстваў і прыватны дом у прыгарадзе Адэсы.
Выбуховымі хвалямі ў некалькіх дамах выбіта шкло. Адна жанчына траўмаваная.