Будаўніку не заплацілі за працу, тады ён спаліў дом, што пабудаваў. Мужчыну шукалі 8 год
43-гадовага жыхара Брэсцкага раёна абвінавацілі ў наўмысным знішчэнні чужой маёмасці, «здзейсненым агульнанебяспечным спосабам, што пацягнула прычыненне шкоды ў буйным памеры».
Як піша Генпракуратура, абвінавачаны ў 2015 годзе ў адпаведнасці з дамовай узвёў жылы дом і гаспадарчую пабудову. Завяршыўшы работы па будаўніцтве, ён папрасіў разлічыцца.
«Атрыманы ад пацярпелага адказ яго не задаволіў — ён паведаміў пацярпеламу, што «прасцей будзе дом спаліць», — піша пракуратура.
На наступны дзень мужчына і спаліў дом і гаспадарчую пабудову.
Пасля гэтага мужчына ўцёк, яго шукалі восем гадоў.
Яму прысудзілі пазбаўленне волі на 3 гады 6 месяцаў папраўчай калоніі ва ўмовах узмоцненага рэжыму.
На карысць пацярпелага з абвінавачанага спагнана сума ў памеры 17 тысяч рублёў.
Прыгавор не ўступіў у законную сілу, можа быць абскарджаны і апратэставаны ў апеляцыйным парадку.