У метро Лондана знайшлі «сляды прывідаў»
Аднак плямы, якія нагадваюць сілуэты людзей, маюць не містычную, а цалкам празаічную прыроду.
Фота: Бі-бі-сі
Кампанія Transport for London (TfL), якая кіруе грамадскім транспартам брытанскай сталіцы, спрабуе пазбавіцца ад слядоў прывідаў, якія з'явіліся на платформах Елізавецінскай лініі (Elizabeth line) — самай новай у лонданскай транспартнай сістэме, піша Бі-бі-сі.
Плямы, якія нагадваюць сілуэты людзей, маюць не містычную, а цалкам празаічную прыроду. Яны ўтварыліся за сядзеннямі, бо пасажыры пастаянна абапіраюцца на сцены спіной.
Дэпутат Лонданскай гарадской рады Каралін Піджэн спытала аб гэтай праблеме мэра горада Садык Хана. Яна пацікавілася, якім менавіта чынам TfL турбуецца аб чысціні станцый з тым, каб яны «захоўвалі свежы выгляд на працягу многіх дзесяцігоддзяў».
Офіс мэра адказаў: «на ўсіх станцыях, якія ўваходзяць у сетку TfL, старанна рэалізуецца праграма ўборкі, каб пасажыры знаходзіліся ў чыстых і бяспечных умовах».
Елізавецінская лінія пачала працаваць у маі 2022 года, яна самая новая ў лонданскай транспартнай сістэме і ўваходзіць у чыгунку Crossrail.
Працягласць лініі складае 117 кіламетраў, яна ў тым ліку праходзіць праз цэнтр Лондана і злучае аэрапорт «Хітроу» на захадзе сталіцы з паўднёва-ўсходнімі раёнамі горада.
Цяпер паслугамі Елізавецінскай лініі карыстаюцца каля 3,5 млн пасажыраў у тыдзень.
Чытайце таксама:
Пошта Брытаніі выпускае маркі са Spice Girls. Гурту 30 гадоў
Попыт на вінілавыя кружэлкі ў Брытаніі дасягнуў піку з 1990 года
Бэнксі прымацаваў дроны на знаку «Stop» у Лондане. Знак скралі