Пад Гомелем чырванакніжныя драпежнікі загрызлі амаль 30 ланяў
Інцыдэнт адбыўся ў ноч з 13 на 14 траўня ў вальеры, які знаходзіцца недалёка ад вёскі Даўгалессе Гомельскага раёна. На момант нападу ў вальеры было 38 ланяў, жывымі засталіся толькі дзевяць, расказаў выданню «Смартпрэс» намеснік старшыні Беларускага таварыства паляўнічых і рыбаловаў Юрый Лашкевіч.
Здымак ілюстрацыйны. Фота: Simon Edge / vecteezy.com
«Мы лічым, што хутчэй за ўсё гэта было сямейства рысяў, якое вучыла сваіх кацянят паляваць. Таму што ўсе выяўленыя 27 ланяў былі з перакушаным горлам», — пракаментаваў здарэнне Юрый Лашкевіч.
Таксама магчымай прычынай здарэння лічаць геолагаразведку. якую праводзіць у гэтым месцы «Беларуснафта», што магло паўплываць на міграцыю рысі.
Вальер памерам 800х200 метраў знаходзіўся пад кругласутачнай аховай егераў і паляўнічых, аднак у ноч, калі гэта здарылася, егер дзяжурыў на іншым краі тэрыторыі.
У вальеры на ператрымцы са снежня 2023 года знаходзіліся лані, якіх павінны былі выпусціць у паляўнічыя гаспадаркі ў чэрвені гэтага года.
Чытайце таксама:
Харызматычны драпежнік нашых лясоў. Таямніцы беларускай рысі
«Колькасць мядзведзяў галапуе ў нашай краіне». Шуневіч прапанаваў шляхі вырашэння праблемы