Ранішняя атака на Украіну каштавала Расіі амаль 1,3 мільярда даляраў
Масіраваная паветраная атака на Украіну, здзейсненая 26 жніўня, каштавала Расіі каля 1,26 млрд даляраў, падлічыла ўкраінскае выданне «Економічна правда».
Самалёт Ту-160 з камплектамі ракет Х-101 і Х-55СМ. Фота: Міністэрства абароны Расіі
Паводле паведамлення прэс-службы Паветраных сілаў УСУ, усяго ў ноч на 26 жніўня радыётэхнічнымі войскамі Паветраных сілаў было выяўлена і суправоджана 236 сродкаў паветранага нападу праціўніка: 127 ракет і 109 ударных БПЛА.
Сярод іх былі 3 аэрабалістычныя ракеты «Кінжал», 6 балістычных ракет «Іскандэр-М», 77 крылатых ракет X-101, 28 крылатых ракет «Калібр», 3 крылатыя ракеты X-22; 10 кіраваных авіяцыйных ракет X-59/X-69; 109 ударных БПЛА Shahed-131/136.
Паводле звестак выдання, БПЛА Shahed-131/136 можа каштаваць ад 49 тыс. даляраў, калі казаць пра ўласную вытворчасць РФ, і да 290 тыс. даляраў, калі гаворка ідзе пра імпарт з Ірана. За аснову ўзялі сярэднюю цану, якая планавалася для імпарту з Ірана — 193 тыс. даляраў. Такім чынам, 109 ударных БПЛА «Шахед» каштавалі РФ каля 21,3 млн даляраў.
Кошт ракеты «Кінжал» складае 10 млн даляраў, агульная сума выпушчаных ракет — 30 млн даляраў.
Кошт ракеты X-22 ацэньваюць у 1 млн даляраў, гэта значыць агульная сума за выпушчаныя ракеты складае 3 млн даляраў.
Ракета X-101 каштуе 13 млн даляраў за адзінку, таму агульная сума выпушчаных ракет гэтага тыпу складае 1 млрд даляраў.
Паводле інфармацыі выдання Defence Express, кошт адной ракеты «Калібр» каштуе 6,5 млн даляраў, такім чынам агульная сума выдаткаў на гэтую ракету складала 182 млн даляраў.
Ракеты X-59/X-69 каштуюць па 0,5 млн даляраў за адзінку, такім чынам агульная сума выпушчаных ракет гэтага тыпу складае 5 млн даляраў.
Балістычная ракета «Іскандэр-М» можа каштаваць 3 млн даляраў, то-бок агульны кошт усіх выпушчаных ракет гэтага тыпу — 18 млн даляраў.
Такім чынам, агульная сума, якую Расія выдаткавала на ранішнюю атаку 26 жніўня па Украіне, складае 1,26 млрд даляраў, робіць выснову «Економічна правда».
Чытайце таксама:
Ракеты і беспілотнікі падчас расійскай атакі на Украіну раніцай былі нацэлены на Кіеўскую ГЭС
Уначы каля трох шахедаў маглі заляцець у Беларусь — Беларускі Гаюн
У выніку масіраванай атакі Расіі пацярпелі 15 абласцей Украіны: ёсць параненыя і загінулыя
Расіяне наносяць магутныя ўдары па ўкраінскай энергетыцы
Па ўсёй Украіне абвешчаная паветраная трывога: больш за дзясятак Ту-95МС выйшлі на пускавыя рубяжы