Беларусаў чакаюць змены па візах у Вялікабрытанію
Вялікабрытанія з новага года змяняе візавы цэнтр у Беларусі.
Візавы цэнтр TLScontact у Мінску з 1 студзеня 2025 года спыніць усе працэдуры па брытанскіх візах. Усе паўнамоцтвы пераходзяць да добра вядомага беларусам цэнтра VFS Global.
З 4 снежня кліенты больш не змогуць атрымаць доступ да свайго анлайн-акаўнта на TLScontact, у гэты момант пачнецца пераход на сістэму VFS Global. Паслуга экспрэс-дастаўкі кур’ерам ужо недаступная праз TLScontact.
Для тых, хто запісаўся на прыём да 4 снежня, ніякіх зменаў няма. Але калі рашэнне па заяве не паспее быць прынята да закрыцця цэнтра, справа і ўсе звязаныя дакументы будуць бяспечна перададзены ў VFS Global.
Візавы цэнтр VFS Global у Беларусі таксама прымае дакументы на шэнгенскія візы Польшчы і іншых краін.