Паліцыя разагнала пратэст у цэнтры Тбілісі
Паліцэйскія працягвалі разгон дэманстрантаў амаль пяць гадзін.
Newsgeorgia.ge
Праспект Руставелі ў цэнтры Тбілісі зачысцілі ад пратэстоўцаў, адтуль адводзяць паліцэйскія сілы, піша Newsgeorgia.ge.
Зараз там працуюць пажарныя і супрацоўнікі муніцыпальных службаў. Яны тушаць падпаленыя смеццевыя бакі, разбіраюць барыкады і чысцяць дарогу, на якой дэманстранты пакінулі пратэсныя графіці.
Паліцэйскія працягвалі разгон дэманстрантаў амаль пяць гадзін. Сілавікі ўзялі ў ачапленне ўчастак праспекта.
Пратэстоўцаў, якіх адціскалі ад парламента, бліжэй да станцыі метро Руставелі сустракалі кардоны. Ва ўдзельнікаў акцыі практычна не было магчымасці адысці з месца.
Спецназ пераследваў іх і затрымліваў, нават тых, хто спрабаваў схавацца ў крамах і аптэках.
Колькасць пацярпелых і затрыманых дагэтуль невядомая. Гаворка ідзе пра дзясяткі чалавек.
Тысячы грамадзян сабраліся на стыхійную пратэстную акцыю на Руставелі ўвечары ў чацвер пасля таго, як прэм'ер Іраклій Кабахідзэ абвясціў аб адмове ад пачатку перамоваў аб уступленні Грузіі ў Еўрасаюз.
Разгон пратэснай акцыі на праспекце Руставелі пачаўся пасля апоўначы, прыкладна а 2 гадзіне ночы. Супраць пратэстоўцаў ужылі вадамёты, светлашумавыя гранаты, слезацечны газ і іншыя спецсродкі.