З’явілася дыпфэйкавая відэазаява Ціханоўскай, што яна ідзе ў адстаўку. Рыхтаваліся даволі старанна
Сёння па беларускіх чатах адбылася чарговая рассылка. У каментарах да фэйкавага допіса спецслужбісты лаюць Ціханоўскую ды прапануюць ёй ісці ў адстаўку.
Скрыншот з фэйкавага канала
Фэйкавы допіс перапошчваюць з поўнай копіі афіцыйнага канала Святланы Ціханоўскай. У ім скапіяваная нават колькасць падпісантаў (да сотняў), а таксама шмат пастоў з арыгінальнага канала Ціханоўскай. Таму ў першы момант некрытычныя спажыўцы гэтага кантэнту могуць сапраўды паверыць, што зварот належыць дэмакратычнай лідарцы.
Фэйкавы зварот сцвярджае, што Святлана Ціханоўская пакідае сваю пасаду і саступае месца Паўлу Латушку. Відэа зробленае з дапамогай нейрасетак.
У чатах адразу пасля рэпостаў спецслужбісты самі пачынаюць з сабой сварыцца з цалкам пустых акаўнтаў.
Каментары ад цалкам пустых акаўнтаў у адной з суполак
Святлана Ціханоўская ўжо адрэагавала на гэты ўкід, размясціўшы кароткі зварот у сваім сапраўдным тэлеграм-канале.
«Я была ў дарозе і не змагла адразу адрэагаваць на фэйкавае відэа, якое з’явілася, пра тое, што я некуды сыходжу, — адзначыла нацыянальная лідарка. — Мае дарагія беларусы ды беларусачкі, я, вядома, застаюся з вамі плячо ў плячо, каб працягваць нашу барацьбу дзеля нашай роднай Беларусі».
Адзначым, што гэтая рассылка зробленая дакладна па той жа схеме, што і мінулая рассылка нібыта ад канала «Чэсных людзей».
Чытайце таксама:
ГУБАЗіК ладзіць рассылку з тэлеграм-акаўнтаў затрыманых беларусаў