Новы ўрад Германіі рыхтуецца да рэкордных выдаткаў на войска
Будучы ўрад Германіі абмяркоўвае маштабныя інвестыцыйныя пакеты, якія могуць перавысіць сотні мільярдаў еўра.
Фрыдрых Мерц. Фота: Nietfeld / picture alliance via Getty Images
Як стала вядома Bild, падчас перамоваў паміж ХДС/ХСС і Сацыял-дэмакратычнай партыяй Германіі гаворка ішла аб стварэнні двух фондаў: аднаго для Бундэсвера (узброеных сіл), другога — для абнаўлення інфраструктуры.
Паводле інфармацыі Bild, у абодва фонды могуць унесці «значна больш за 100 мільярдаў еўра». Вядучыя нямецкія эканамісты ацанілі патрэбы ў 400 мільярдаў еўра для абароны і да 500 мільярдаў — для інфраструктурных праектаў.
Адначасова абмяркоўваецца магчымая рэформа «пазыковага тормазу» — закона, які стрымлівае рост дзярждоўгу. Лідар ХДС Фрыдрых Мерц выказаў асцярожную гатоўнасць да зменаў, але пакуль невядома, калі гэта можа адбыцца. Варыянт рэформы да канца сакавіка выглядае малаімаверным, а пасля стварэння новага ўрада «Альтэрнатыва для Германіі» і «левыя» могуць заблакаваць ініцыятыву, якая патрабуе дзвюх трацін галасоў у Бундэстагу.
Фрыдрых Мерц мае намер найбліжэйшым часам асабіста сустрэцца з прэзідэнтам ЗША Дональдам Трампам. Мяркуецца, што адной з галоўных тэм сустрэчы стануць планы ўрада Германіі па фінансаванні абароны краіны.