У Беларусі выпусцілі парфуму з водарам бетону
Навінку падрыхтавалі да свята 8 сакавіка, піша «Точка».
Інтэр'ерная парфума Fundamental №1. Фота: «Точка», СБК
Вырабіў незвычайную парфуму завод «Сучасныя бетонныя канструкцыі». На гэта аўтараў натхнілі «жанчыны, якія працуюць на заводзе».
Інтэр'ерную парфуму назвалі Fundamental №1. Да арамату падрыхтавалі і адмысловы прома-ролік.
Вытворца кажа, што гэты водар сімвалізуе баланс грубых і далікатных формаў — як глыбіня жаночага погляду напаўняе розныя сферы любоўю да нюансаў і прыгажосці, ствараючы вытанчаны і выразны вынік.
«Жаночая сіла тут — гэта саюз жорсткасці і гнуткасці, спалучэнне логікі і інтуіцыі, тэхналогіі і эстэтыкі. У аснове ўсяго — натхненне жанчыны. Я б сказала, натхненне ўсіх жанчын нашага прадпрыемства, якія займаюцца такой няпростай справай, як вытворчасць жалезабетонных канструкцый», — пракаментавала «Точке» дырэктарка завода Таццяна Бігун.
Па словах генеральнай дырэктаркі «А-100 Дэвалапмент», куды ўваходзяць «Сучасныя бетонныя тэхналогіі», Ганны Ястрабавай, на кіруючых пасадах іх кампаній шмат гадоў знаходзяцца жанчыны:
«Мы даўно пераканаліся, што менавіта жаночы падыход да кіравання вытворчасцю і будаўніцтвам дае магчымасць ствараць нестандартныя праекты, надаваць такую ўвагу дэталям».