БЕЛ Ł РУС

ГУБАЗіК выклаў дыскрэдытуючае фота затрыманага, які «прапагандаваў нацызм». Але на здымку скандальны Z-блогер

16.04.2025 / 9:16

Nashaniva.com

На адным з фота Z-блогер з украінскімі каранямі, які піша пад псеўданімам Альгерд Сямёнаў. Расказваем пра яго.

Альгерд Сямёнаў. Фота: Укантакце

Што здарылася?

ГУБАЗіК у панядзелак выклаў публікацыю пра затрыманне 35-гадовага беларуса. Там сцвярджалася, што ён вёў «праварадыкальныя нацыяналістычныя каналы» і «папулярызаваў нацызм».

Каб дыскрэдытаваць затрыманага і ўскладніць яго знаходжанне ў зняволенні, сілавікі апублікавалі прыватныя здымкі мужчыны, нібыта знойдзеныя ў яго мабільніку. Ён пазіруе ў жаночым адзенні і з морквай у роце. Такія фатаграфіі могуць прывесці да пераводу арыштаванага ў «нізкі статус».

Аднак прынамсі на адным са здымкаў дакладна не затрыманы беларус, а расійскі Z-блогер з украінскімі каранямі. Можа, гэтага расійскага блогера і схапілі сілавікі? Не, ён працягвае абнаўляць свае старонкі. Дый на відэа з затрымання чалавек зусім іншай камплекцыі. 

Аднак публікацыя фэйкавага фота наводзіць на думку, што і астатнія ілюстрацыі, якія выдаюць за здымкі затрыманага, могуць быць фальшывымі.

Скрыншот з тэлеграм-канала ГУБАЗіК

Хто такі Альгерд Сямёнаў?

Цімур (Альгерд) Сямёнаў. Фота з ягонай старонкі Укантакце

Па звестках Digital Intelligence Team, сапраўднае імя «Альгерда Сямёнава» — Цімур Дзмітрыевіч Сямёнаў. Ён нарадзіўся ў 1995 годзе ў Кіеве. Пасля школы паехаў вучыцца ў Варшаву, у Вышэйшую школу сацыяльнай псіхалогіі. Пасля перабраўся ў Расію — спачатку ў Краснаярск, а пасля ў Санкт-Пецярбург (прынамсі так ён піша ў сацсетках).

З 2013 года Сямёнаў актыўнічае ў расійскіх ультраправых колах. З 2017-га вядзе ўласны блог, таксама вёў правакансерватыўны блог з назвай Europride. Горача падтрымлівае Расію ў вайне яшчэ з 2014 года, сябе называе гарачым прыхільнікам вайны, а таксама правакансерватарам і праваслаўным.

Сямёнаў кажа, што Украіне патрэбная «татальная русіфікацыя». Вітае ён і ўдары Расіі па Украіне, напрыклад, нядаўнюю жахлівую атаку па Сумах, падчас якой загінулі больш за 30 мірных жыхароў горада. Вось адна з ягоных характэрных цытатаў:

«Аніякіх саступак цяперашняй палітычнай эліце Украіны. Занадта шмат пастаўлена на кон. Або татальная русіфікацыя, або татальная вайна да апошняй забітай бандэраўскай поскудзі».

Допіс з канала Сямёнава

Зарабляе «Альгерд» інтэрнэт-махлярствам, прадаючы анлайн-курсы кшталту «Шэры заробак на замежных сайтах».

Фатаграфіі Z-блогера ў жаночым адзенні ўсплылі ў 2017 годзе і даўно сталі інтэрнэт-мемам. Сямёнаў не адмаўляў, што на здымках менавіта ён.

Чаму ГУБАЗіК вырашыў выдаць здымак Z-блогера за фота затрыманага — незразумела.

Альгерд Сямёнаў. Фота: Укантакце

Чытайце таксама:

З’явілася дыпфэйкавая відэазаява Ціханоўскай, што яна ідзе ў адстаўку. Рыхтаваліся даволі старанна

Расійскага коміка затрымалі ў Беларусі за жарты пра ўдзельнікаў СВА. Беларускія сілавікі павесілі на коміка мясарубку

ГУБАЗіК ладзіць рассылку з тэлеграм-акаўнтаў затрыманых беларусаў

Каментары да артыкула