Зяленскі: Калі поўная цішыня сапраўды запануе, Украіна прапануе прадоўжыць яе
Прэзідэнт Украіны Уладзімір Зяленскі ў сваім тэлеграм-канале пагадзіўся цалкам спыніць агонь, калі «поўная цішыня сапраўды запануе», і нават прапанаваў не абмяжоўвацца адным велікодным днём. Але дзейнічаць украінцы будуць у залежнасці ад паводзін Расіі.
Уладзімір Зяленскі. Фота: AP Photo / Efrem Lukatsky
Зяленскі нагадаў, што ўжо 39 дзён таму ЗША зрабілі прапанову поўнага і безумоўнага спынення бакамі агню тэрмінам на 30 дзён. Украіна прыняла яе станоўча, у той час як Расія праігнаравала. Што ж тычыцца сённяшняй ініцыятывы Пуціна, то:
«Калі цяпер Расія раптам гатовая сапраўды далучыцца да фармату поўнай і безумоўнай цішыні, Украіна будзе дзейнічаць люстрана — так, як будзе з расійскага боку. Цішыня ў адказ на цішыню, ўдары ў абарону ад удараў».
Але Украіна гатовая гэтым не абмяжоўвацца:
«Калі поўная цішыня сапраўды запануе, Украіна прапануе прадоўжыць яе і пасля заканчэння велікодных сутак 20 красавіка ў далейшым».
На думку Зяленскага, рэакцыя на гэту прапанову засведчыць сапраўдныя намеры Расіі, бо
«30 гадзін дастаткова для загалоўкаў, але не для сапраўдных мер умацавання даверу. Трыццаць дзён могуць даць свету шанец».
У той жа час, як Зяленскаму дакладвае галоўнакамандуючы УСУ, на некаторых участках фронту і цяпер працягваюцца расійскія штурмавыя дзеянні і не сціхае расійская артылерыя.
«Таму даверу да слоў з Масквы няма. Мы занадта добра ведаем, як Масква маніпулюе, і заўсёды гатовыя да ўсяго», — канстатуе Зяленскі.
У сувязі з гэтым ён падкрэслівае, што УСУ будуць дзейнічаць рацыянальна, даючы на кожны расійскі ўдар люстраны адказ. Рашэнні ж будуць прымацца на падставе падрабязных дакладаў галоўнакамандуючага УСУ Аляксандра Сырскага, якіх толькі на гэты вечар запланавана ўжо два.
Чытайце таксама:
Пуцін аб'явіў велікоднае перамір'е
Зяленскі заявіў пра расійскія дроны ва ўкраінскім небе пасля аб'яўлення пуцінскага перамір'я
МЗС Украіны пра пуцінскае перамір'е: Будзем глядзець на дзеянні, а не на словы