На Гомельшчыне жыхарам, прызнаным «дармаедамі», рассылаюць позвы з міліцыі

Жыхары Гомельскай вобласці, уключаныя ў спісы «незанятых у эканоміцы», сталі атрымліваць лісты з міліцыі. У адным з «апавяшчэнняў аб яўцы», перададзеным выданню «Флагшток», ва ўльтыматыўным тоне пазначана, што атрымальніку неабходна з'явіцца ў мясцовы РАУС «для вырашэння пытання працаўладкавання».

Выхаваўчая гутарка з беспрацоўным. Фота: «Калінкавіцкія навіны»

Раней такія пасланні «незанятым у эканоміцы» не прыходзілі. Усе мінулыя гады «дармаеды» атрымлівалі толькі лісты з прапановай пацвердзіць свой статус або звярнуцца па дапамогу ў працаўладкаванні.

Таксама ў паведамленні гаворыцца аб неабходнасці прыйсці ў рэгіянальнае ўпраўленне па працы, занятасці і сацыяльнай абароне, а для пацвярджэння занятасці або цяжкай жыццёвай сітуацыі прынесці патрэбныя дакументы ў раённую камісію па садзейнічанні занятасці.

Фота: «Вясна»

У некаторых выпадках такія паведамленні-позвы прыходзілі грамадзянам, якія ўжо 5 і больш гадоў не жывуць у Беларусі і працуюць за мяжой.

Пры гэтым у пачатку апавяшчэння гаворыцца, што праца міліцыі праводзіцца ў мэтах «забеспячэння выканання канстытуцыйнага абавязку грамадзян аб удзеле ў фінансаванні дзяржаўных выдаткаў шляхам выплаты падаткаў». Хоць паводле нават апошняй версіі лукашэнкаўскай Канстытуцыі праца з'яўляецца правам чалавека, а не абавязкам.

Раней «Флагшток» паведамляў, што ў Гомельскай вобласці сталі праводзіць прымусовыя «кірмашы вакансій» на базе аддзелаў міліцыі.

Каментары да артыкула