БЕЛ Ł РУС

На аўкцыёне прадалі карціну Шагала амаль за 3,5 мільёна даляраў

17.05.2025 / 7:37

Nashaniva.com

Аукцыённыя дамы Sotheby’s і Christie’s на гэтым тыдні правялі вячэрнія таргі сучасным мастацтвам. Сярод лотаў былі і карціны Марка Шагала. Адна з прац знайшла новага ўладальніка амаль за $3,5 млн, піша OL са спасылкай на сайт Christie’s.

Фота: Christie's

Марк Шагал напісаў «Радасць цырка» ў 1983 годзе, калі жыў у французскай камуне Сен-Поль-дэ-Ванс на Блакітным беразе. Мастак часта пісаў карціны, прысвечаныя цырку, бо вельмі яго любіў.

Шагал неаднаразова ўспамінаў, як наведваў гастралюючыя цыркавыя трупы ў горадзе свайго дзяцінства — Віцебску. 

Шагал пачаў працаваць над гэтай карцінай, калі яму было больш за 90 гадоў. Работа «Радасць цырка» перадае ўсе ключавыя ўспаміны мастака пра цырк, у тым ліку пра гарады, з якімі ў яго звязаны самыя цёплыя ўспаміны. Так, на левай частцы палатна намаляваны начны Парыж і яго сімвал — Эйфэлева вежа, а на правай — тэракотавыя дахі Віцебска.

Аукцыённы дом ацаніў карціну «Радасць цырка» памерам 80,8 на 115,7 см у $1,8—2,5 млн. Новы ж уладальнік заплаціў за яе $3,43 млн.

Таксама падчас гэтых таргоў з малатка пайшла карціна «Мора». Мастак напісаў яе ў 1945 годзе, праз год пасля смерці сваёй першай жонкі Бэлы. Работа лічыцца адной з найвялікшых одаў мастака ў яе гонар.

У сваіх успамінах Бэла Розэнфельд пісала, што сіні быў першым колерам, які яна ўбачыла ў момант сустрэчы з мастаком, бо ў Шагала былі вочы гэтага колеру. У сінім Шагал і напісаў яе вобраз з вэлюмам і вясельным букетам у цэнтры працы.

Па ацэнках Christie’s, работа памерам 56,1 на 45,9 см каштавала ад $800 тыс. да $1,2 млн. Але ў выніку яе прадалі за $945 тыс.

Фота: Sotheby's

Самай дарагой працай Марка Шагала на вячэрнім аўкцыёне сучаснага мастацтва ад Sotheby’s стала карціна «Бау дэ Сен-Жане». Так называецца аднайменная гара ў Сен-Поль-дэ-Вансе. Мастак напісаў гэту працу ў 1969 годзе.

На гэтай карціне Марк Шагал у вобразе гары адлюстраваў сябе і сваю другую жонку Ваву Бродскую. Працу памерам 125 на 113 см ацэньвалі ў $1,2—1,8 млн, а прадалі за $2,18 млн.

Фота: Sotheby's

Другой па кошце працай віцебскага мастака на вячэрнім аўкцыёне ад Sotheby’s стала напісаная ў 1982—1983 гадах карціна «Сонца і чырвоны асёл». Яна перадае эмоцыі Шагала ад жыцця на поўдні Францыі. Працу памерам 81 на 60 см ацэньвалі ў $600—800 тыс., а прадалі за $1,11 млн.

Чытайце таксама:

Упершыню па-беларуску выйшлі ўспаміны Бэлы Шагал

У Ганконгу прадалі працу Шагала за 4,5 мільёна даляраў

Аўтапартрэт звязанага з Віцебскам мастака прадалі ўдвая вышэй ацэнкі. І гэта не Шагал

Каментары да артыкула