На чыгунцы супрацоўнікам адмяняюць надбаўкі і скарачаюць штаты
Сітуацыя з фінансамі Беларускай чыгункі сёння вельмі цяжкая і пагаршаецца практычна кожны дзень. Кампанія пастаянна спрабуе зменшыць выдаткі на рамонт і інвестыцыі, але таксама пад скарачэнні трапляюць і выплаты работнікам, піша Супольнасць чыгуначнікаў Беларусі.
Фота ілюстрацыйнае
Асноўныя выдаткі БЖД — гэта аплата працы і сацыяльныя выплаты, бо чыгунка — працаёмкая сфера, якая патрабуе вялікай колькасці спецыялістаў: машыністаў, рамонтнікаў, дыспетчараў і іншых.
Каб скараціць выдаткі, кіраўніцтва БЖД пачало ўводзіць «непапулярныя меры», якія непасрэдна закранаюць працоўныя спецыяльнасці — тых, хто забяспечвае перавозкі.
8 мая 2025 года начальнік БЖД падпісаў загад, які з 1 чэрвеня адмяняе надбаўкі да заробку за прафесійнае майстэрства і кваліфікацыйныя катэгорыі для ўсіх работнікаў. Гэта значыць, што многія работнікі, у тым ліку машыністы, дыспетчары і іншыя, страцяць значныя сумы — ад 250 да 500 рублёў і больш.
Акрамя гэтага, разгледжваюцца іншыя меры скарачэння выдаткаў, напрыклад, скасаванне матэрыяльнай дапамогі да адпачынку і выплат пры выхадзе на пенсію.
Праводзяцца і аптымізацыі штатаў. Ужо праходзілі скарачэнні на вялікіх станцыях, напрыклад, скасавалі пасады манеўровых дыспетчараў. Іх абавязкі перадаюцца дзяжурным па станцыях без павелічэння аплаты.
Чытайце таксама:
Штадлераўскія цягнікі зноў вымушана мяняюць на савецкія
Беларуская чыгунка збіраецца правесці аптымізацыю штату на 30%
Пенсіянеры зноў змогуць ездзіць у электрычках за палову цаны