У паўднёвай Еўропе прайшлі мітынгі супраць турыстаў
У шэрагу гарадоў Іспаніі і Італіі прайшлі дэманстрацыі супраць залішняга турызму. Мітынгоўцы патрабуюць прымаць менш падарожнікаў.
15 чэрвеня 2025 года, Іспанія, Пальма-дэ-Маёрка: жыхары пратэстуюць супраць масавага турызму на востраве і трымаюць плакат з надпісам «Турысты, вяртайцеся дадому, уцекачы вітаюцца». Фота: Clara Margais / picture alliance via Getty Images
Дэманстрацыі супраць «некантралюемага турызму» прайшлі ў папулярных сярод падарожнікаў гарадах Іспаніі і Італіі ў нядзелю, 15 чэрвеня. Так, каля шасцісот чалавек прынялі ўдзел у мітынгу ў Барселоне, піша DW.
Прысутныя скандавалі: «Ваш водпуск — маё няшчасце» і трымалі ў руках плакаты з надпісамі: «Масавы турызм забівае горад» і «Іх прагнасць губіць нас».
Некаторыя з іх таксама стралялі з вадзяных пісталетаў і ляпілі на вітрыны крам і гатэлі налепкі «Турысты, прыбірайцеся дадому».
За мінулы год Барселона з насельніцтвам у 1,6 мільёна чалавек прыняла 26 мільёнаў турыстаў, зазначае Reuters.
Пратэсты з патрабаваннямі скараціць турыстычны паток прайшлі і ў іншых гарадах паўднёвай Еўропы: у прыватнасці, у Малазе, Пальма-дэ-Маёрцы, Сан-Себасцьяне, Гранадзе і на востраве Ібіца ў Іспаніі, а таксама ў Генуі, Палерма, Неапалі, Мілане і Венецыі ў Італіі. У апошнім горадзе пратэстуючыя хочуць не дапусціць будаўніцтва двух новых атэляў, якія змогуць прымаць каля 1500 турыстаў. Таксама ў Венецыі пратэставалі супраць вяселля там амерыканскага мільярдэра Джэфа Безаса.
У 2025 годзе выдаткі на міжнародныя паездкі ў Еўропе могуць вырасці на 11 працэнтаў да 838 млрд долараў ЗША (727 млрд еўра). Чакаецца, што рэкордную колькасць турыстаў прымуць Францыя і Іспанія.