У калоніі №15 Магілёва знялі з пасады адыёзнага начальніка, які здзекаваўся з палітвязняў
Аляксей Лазарэнка ідзе на пенсію.
Аляксей Лазарэнка
Сваю пасаду пакідае начальнік магілёўскай папраўчай калоніі №15 палкоўнік Аляксей Лазарэнка. 29 чэрвеня 2025 года яму спаўняецца 50 гадоў.
Новым начальнікам калоніі будзе палкоўнік Іван Ігнаценка.
Лазарэнка знаходзіцца пад еўрапейскімі санкцыямі. Дзясяткі палітвязняў сведчылі пра яго неадэкватныя паводзіны — псіхалагічны ціск і нават прымяненне фізічнага гвалту.
Аляксей Лазарэнка першы злева. Фота: komkur.info
Пасля звальнення начальніка наваполацкай калоніі Андрэя Пальчыка менавіта Лазарэнка лічыўся самым адыёзным сярод начальнікаў беларускіх калоній.
«Журналісты, адвакаты — гэта самыя дрэнныя людзі ў свеце», — крычаў Лазарэнка журналісту «Радыё Свабода» Алегу Груздзіловічу, калі той трапіў у ПК №15. Пасля гэтага Груздзіловіча адразу адправілі ў ШІЗА.
У кастрычніку 2024 года ў магілёўскай калоніі загінуў 22-гадовы палітвязень Дзмітрый Шлетгаўэр. Хутчэй за ўсё, ён скончыў жыццё самагубствам у ШІЗА, куды трапіў адразу пасля прыбыцця ў калонію.