Прайшлі вобшукі ў былога міністра абароны Украіны Рэзнікава
Імаверна, следчыя дзеянні звязаныя са справай аб закупках прадуктаў для УСУ па завышаных цэнах.
Фота: Sebastian Gollnow / Pool Photo via AP
Украінскае выданне ZN.UA паведаміла, што 3 ліпеня Нацыянальнае антыкарупцыйнае бюро Украіны правяло вобшукі ў экс-міністра абароны Аляксея Рэзнікава. Дэтэктывы канфіскавалі «неўлічаны» тэлефон і шэраг дакументаў.
З лістапада 2021 па верасень 2023 года Рэзнікаў займаў пасаду кіраўніка Міністэрства абароны Украіны. Падчас яго кіравання ў ведамстве выявілі крадзеж больш за 733 мільёнаў грыўняў (звыш $18 млн) на закупках прадуктаў для УСУ, а таксама замах на растрату яшчэ такой жа сумы.
У выніку пасады страцілі некалькі намеснікаў міністра, але сам Рэзнікаў па гэтай справе не праходзіў у якасці падазраванага.
Меркавана, цяперашнія вобшукі звязаныя з карупцыйнай справай аб закупках прадуктаў для УСУ па завышаных цэнах. Афіцыйнай інфармацыі пакуль не было.