РПЦ запатрабавала ад Беларускай праваслаўнай царквы вярнуць у назвах згадванне Маскоўскага патрыярхата
Сінод РПЦ вырашыў публічна асадзіць кіраўніцтва Беларускай праваслаўнай царквы.
Патрыярх РПЦ Кірыл. Фота: Yegor Aleyev/TASS Host Photo Agency Pool Photo via AP
У адной з пастаноў Сінода РПЦ, пасяджэнне якога прайшло 24 ліпеня 2025 года, вырашана нагадаць кіраўніцтву Беларускага экзархата, мітрапалічых акругаў пра тое, што афіцыйныя найменні такіх (у тым ліку юрыдычныя найменні і найменні, размешчаныя на афіцыйных сайтах і дакументах), а таксама найменні іх кананічных структураў — епархій, прыходаў, манастыроў, падвор’яў і іншых — павінны ўтрымліваць словазлучэнні «Рускай Праваслаўнай Царквы» або «Маскоўскага Патрыярхата». (журнал №54)», — заўважыла «Хрысціянская візія»
Сінод запатрабаваў усе найменні «прывесці ў адпаведнасць з гэтым вызначэннем».
Гнеў маскоўскага начальства можа быць выкліканы тым, што, як паведамляецца ў некаторых крыніцах, у перапрацаваным для перарэгістрацыі статуце БПЦ знікла яе «другое найменне» — Беларускі экзархат Маскоўскага патрыярхата. Менавіта так і ніяк інакш у Маскве называюць Беларускую царкву.
Той жа Сінод РПЦ раней, на пасяджэнні 30 мая 2024 года, зацвердзіў змены і дапаўненні ў статут БПЦ (журнал №53). Праўда, з агаворкай: «з улікам прапанаванай папраўкі». Як можна меркаваць, папраўка тычылася менавіта наймення, і беларускім бокам улічаная не была, што і выклікала ўжо публічны папрок з боку Маскоўскай патрыярхіі.
За апошнія дзесяцігоддзі ў Беларусі склаўся кансэнсус наконт наймення сваёй царквы як «Беларуская Праваслаўная Царква» без грувасткага азначэння «Маскоўскага Патрыярхата». Калі ў свой час ва Украіне была патрэба выкарыстоўваць гэтае дадатковае азначэнне, каб адрозніваць УПЦ МП ад УПЦ Кіеўскага патрыярхата, то ў Беларусі ніякіх альтэрнатыўных царкоўных юрысдыкцый не было. Больш за тое, словазлучэнне «Беларуская праваслаўная царква» ў публічным ужыванні гучыць значна больш зразумела, чым «Беларускі экзархат», бо слова «экзархат» паходзіць з вузкаспецыяльнай кананічнай мовы і абазначае форму арганізацыі і кіравання, якая можа з цягам часу трансфармавацца ў іншую форму.
Несумненна, ужыванне паняцця «Беларуская Праваслаўная Царква» выклікае ў Маскве раздражненне і ўспрымаецца як імкненне да большай адасобленасці ад Масквы, зазначае «Хрысціянская візія».