Былы дарадца прэзідэнта ЗША: Трамп на перамовах не прайграў, але Пуцін відавочна перамог

Дарадца Трампа па нацыянальнай бяспецы падчас ягонай першай адміністрацыі Джон Болтан заявіў, што па выніках сустрэчы на Алясцы можна казаць пра відавочную перамогу Пуціна, хаця і не пра паразу Трампа. Пра гэта ён сказаў у эфіры CNN, піша Еўрапейская праўда.

Былы пасол ЗША ў ААН і былы дарадца па нацыянальнай бяспецы Дональда Трампа лічыць Пуціна «відавочным пераможцам» на сустрэчы лідараў РФ і ЗША адносна расійска-ўкраінскай вайны.

«На маю думку, Трамп не прайграў, але Пуцін відавочна перамог. Трамп выйшаў адтуль з пустымі рукамі — акрамя ‘новых сустрэч’. А вось Пуцін, як мне здаецца, прайшоў значную частку шляху да аднаўлення адносін (што, як я лічу, даўно было яго галоўнай мэтай). Ён пазбег (новых) санкцый, яму не трэба ісці на спыненне агню, наступная сустрэча не прызначаная, Зяленскаму пра гэта нічога не паведамілі да гэтай прэс-канферэнцыі», — патлумачыў ён.

«Гэта ўсё яшчэ далёка не скончылася, але я б сказаў, што Пуцін дасягнуў большасці з таго, што хацеў, а Трамп — вельмі мала», — падсумаваў Болтан.

Экс-дарадца таксама падзяліўся ўражаннем, што Трамп пасля сустрэчы выглядаў «вельмі стомленым».

Каментары да артыкула