Спявак Дзядзя Ваня страціў працу. Ён усё яшчэ адбывае хатнюю хімію

У інстаграме артыст распавёў, што ён вымушаны пакінуць працу праз прычыны, якія ад яго не залежаць.

Іван Вабішчэвіч. Скрыншот відэа ў тыктоку

Летась Івана Вабішчэвіча затрымалі ў Беларусі. Яму прад'явілі абвінавачанне па ч.1 арт. 342 КК (арганізацыя дзеянняў, якія груба парушаюць грамадскі парадак, або актыўны ўдзел у іх). Судзілі артыста за ўдзел у нядзельным маршы ў Мінску 23 жніўня 2020 года. У снежні Вабішчэвічу далі два з паловай года хатняй хіміі. Яго таксама ўключылі ў «спіс экстрэмістаў».

Сёлета ён пачаў актыўна шукаць працу і ў выніку працаўладкаваўся ў бар «Кнігі і дым», што на мінскай вуліцы Зыбіцкай, арт-менеджарам. Спявак актыўна здымаўся ў відэа для сацыяльных сетак і распавядаў пра навінкі ў меню.

Але ж папрацаваць там атрымалася крыху больш за паўгода. Пра тое, што ён вымушаны пакінуць працу не па сваім жаданні, Дзядзя Ваня распавёў у інстаграме. Нягледзячы на дрэнныя навіны, ён не губляе аптымізму: «Шоу працягваецца, рок-н-рол будзе жыць яшчэ доўга».

Каментары да артыкула