«Заблакуем усё»: у Францыі маштабныя пратэсты, амаль 200 затрыманых і транспартны калапс
У сераду раніцай па ўсёй Францыі пачаліся пратэсты, арганізаваныя рухам Bloquons Tout («Заблакуем усё»). Пратэстоўцы перакрылі аўтамагістралі і парушылі працу чыгуначнага транспарту. Паводле звестак уладаў, былі праведзены дзясяткі арыштаў, па ўсёй краіне разгорнутыя сілы бяспекі, піша Бі-бі-сі.
Фота: Jerome Gilles / NurPhoto via Getty Images
Міністр унутраных спраў Бруно Рэтаё паведаміў журналістам у сераду раніцай, што па ўсёй краіне разгорнута 80 000 супрацоўнікаў сіл бяспекі, у тым ліку 6000 у Парыжы. Французскія СМІ чакаюць, што ў дэманстрацыях возьмуць удзел да 100 000 чалавек.
«Мы рызыкуем сутыкнуцца з мабілізацыяй, якая прывядзе да акцый па ўсёй краіне», — сказаў Рэтаё. Паводле яго звестак, ужо арыштавана каля 200 чалавек.
Паведамляецца, што пратэстоўцы захапілі Ліёнскі вакзал у Парыжы.
Рэтаё паведаміў, што каля 50 чалавек у капюшонах спрабавалі заблакаваць рух у Бардо, а ў Тулузе пажар на кабельнай лініі прывёў да збояў у руху паміж Тулузай і Ошам на паўднёва-захадзе Францыі, нягледзячы на тое, што яго ўдалося хутка патушыць. Асобныя акцыі таксама прайшлі ноччу ў Парыжы, аднак падрабязнасцей міністр не прывёў.
Парыжская паліцыя паведаміла, што на гэты момант было арыштавана 75 чалавек, але таксама не паведаміла падрабязнасцей пра тое, дзе і за што гэтыя людзі былі арыштаваныя.
Аператар аўтамагістраляў Vinci паведаміў пра пратэсты і збоі ў руху на аўтамагістралях па ўсёй Францыі, уключаючы Марсэль, Манпелье, Нант і Ліён. Французскі дзяржаўны чыгуначны аператар SNCF чакае збояў у працы, у прыватнасці, рэгіянальных цягнікоў TER і цягнікоў Intercités. Сетка хуткасных цягнікоў TGV, як чакаецца, не пацерпіць ад пратэстаў.
Сёння раніцай SNCF паведаміў, што «два зламысныя акты» мінулай ноччу парушылі працу некаторых цягнікоў на поўдні Францыі.
Было выяўлена два «пашкоджанні кабеля», адно паміж Мармандам і Ажэнам у паўднёва-заходнім рэгіёне Ло-э-Гарана, «што прывяло да парушэння чыгуначнага руху паміж Бардо і Тулузай», паведаміў SNCF. Яшчэ адно пашкоджанне ў Калам’е, прыгарадзе Тулузы, таксама прывяло да збояў у руху цягнікоў.
Рух «Заблакуем усё» набыў папулярнасць у сацсетках гэтым летам, і яго ўжо параўноўваюць з «жоўтымі камізэлькамі», якія пачалі пратэставаць супраць павышэння коштаў на паліва ў 2018 годзе, але хутка перараслі ў больш шырокі пратэсны рух супраць эканамічных рэформаў прэзідэнта Эмануэля Макрона. Актывісты руху «Заблакуем усё» лічаць французскую палітычную сістэму такой, што больш не выконвае свайго прызначэння.
Аналітыкі лічаць, што рух узнік сярод правых груп, але затым быў падхоплены левымі і крайнімі левымі. Дэманстрацыі відавочна не дапамогуць аслабіць палітычную напружанасць у Францыі: усяго два дні таму парламент выказаў вотум недаверу прэм’ер-міністру Франсуа Байру, прымусіўшы яго пайсці ў адстаўку.
У аўторак Макрон прызначыў ужо пятага прэм’ер-міністра менш чым за два гады — ім стаў 39-гадовы Себасцьен Лекорню. Лекорню — саюзнік Макрона і лічыўся адным з фаварытаў на гэтую пасаду. Апошнія тры гады ён займаў пасаду міністра абароны, надаючы асаблівую ўвагу рэакцыі Францыі на вайну Расіі ва Украіне.
Яму трэба будзе вырашыць задачу, на якой спатыкнуўся яго папярэднік Франсуа Байру: скараціць растучы дзяржаўны доўг Францыі, які да пачатку гэтага года дасягнуў 3,3 трлн еўра і склаў 114% ВУП краіны.
Байру прапанаваў скараціць бюджэт на 44 млрд еўра і заадно адмяніць два агульнанацыянальныя выходныя. Гэта выклікала пратэст як справа, так і злева ў парламенце, Байру абвясціў галасаванне аб даверы ўраду і праваліў яго. У заяве Елісейскага палаца гаворыцца, што Лекарню было даручана правесці кансультацыі з палітычнымі партыямі з мэтай прыняцця наступнага бюджэту Францыі.
Прызначэнне Лекарню было пазітыўна ўспрынята цэнтрыстамі. Правая «Нацыянальнае аб’яднанне» Марын Ле Пэн таксама дало зразумець, што пакуль гатова супрацоўнічаць з новым прэм’ерам.
А вось Жан-Люк Меланшон з радыкальна левай партыі «Непакорная Францыя» прызначэннем Лекорню не ўражаны: ён лічыць, што нічога не змянілася, а Макрону пара сыходзіць з пасады прэзідэнта. Меланшон ужо папярэдзіў, што яго партыя паставіць на галасаванне пытанне аб даверы новаму ўраду.