Памёр галоўны рэдактар знакавага часопіса Перабудовы «Огонёк» Віталій Кароціч
Памёр Віталій Кароціч — савецкі і ўкраінскі паэт, публіцыст, грамадскі дзеяч. У гады Перабудовы — галоўны рэдактар аднаго з найбольш уплывовых часопісаў «Огонёк», які адыграў вялікую ролю ў раскрыцці праўды пра сталінскія рэпрэсіі і ў дэмакратычных пераменах у СССР, піша Расійская служба Радыё Свабода.
Фота: Радыё Свабода
Кароціч памёр у Маскве. Яму было 89 гадоў.
Віталій Кароціч нарадзіўся ў Кіеве ў 1936 годзе. Паводле адукацыі — медык. У 1960‑я гады стаў вядомы як паэт, пісаў на ўкраінскай і рускай мовах. Яго верш «Апошняя просьба старога лірыка» ў перакладзе Юны Морыц стаў вядомай песняй «Перавядзі мяне цераз Майдан», якую выконвалі Таццяна і Сяргей Нікіціны.
Кароціч працаваў рэдактарам розных літаратурных выданняў у Кіеве. Як публіцыст рабіў матэрыялы пра замежныя краіны з лаяльных да савецкага ладу пазіцый. Ва ўкраінскіх архівах існуюць дакументы пра яго супрацоўніцтва з КДБ.
Пасля пачатку Перабудовы ў СССР, у 1986 годзе, стаў галоўным рэдактарам часопіса «Огонёк» і заставаўся ім да 1991 года. Пад кіраўніцтвам Кароціча наклад «Огонька» вырас да 4 мільёнаў асобнікаў.
Часопіс пісаў на надзённыя тэмы, у тым ліку пра прывілеі партыйнай наменклатуры, карупцыю, дзедаўшчыну ў арміі. У ім публікаваліся многія, што пазней сталі вядомымі, журналісты.
Адна з галоўных тэм «Огонька» — сталінскія рэпрэсіі і лёсы іх ахвяр.
Выданне актыўна выступала на карысць курсу на галоснасць і дэмакратызацыю. Кароціч быў абраны народным дэпутатам СССР і ўвайшоў у склад Міжрэгіянальнай групы, якая выступала як дэмакратычная апазіцыя да Міхаіла Гарбачова.
У жніўні 1991 года, даведаўшыся пра путч ГКЧП, прыняў рашэнне застацца ў ЗША, з-за чаго давялося пакінуць пасаду галоўнага рэдактара «Огонька». Да 1998 года выкладаў у ЗША, затым вярнуўся ў Кіеў. Узначальваў рэдакцыйную раду газеты «Бульвар Гардона». Выступіў у падтрымку Віктара Януковіча.
У 2014 годзе ў інтэрв’ю Радыё Свабода не стаў прама адказваць на пытанне аб прыналежнасці Крыма сказаўшы пры гэтым: «Немагчыма паверыць у тое, што Расія пачне вайну з Украінай. Такога не было ніколі ў гісторыі».