Ігар Бокій атрымаў ад дзяржавы больш за $1 мільён прызавых — а цяпер вырашылі, што ён занадта здаровы для Паралімпіяды
Самы тытулаваны плывец у гісторыі Паралімпіяд сярод мужчын — беларус Ігар Бокій — больш не зможа браць удзел у Паралімпійскіх гульнях. Пра гэта паведаміў генеральны сакратар Паралімпійскага камітэта Беларусі Мікалай Шудзейка ў эфіры СТБ.
Ігар Бокій. Фота: Dean Mouhtaropoulos / Getty Images
Паводле слоў Шудзейкі, прычына — змена міжнародных правіл спартыўна-медыцынскай кваліфікацыі.
З 2024 года для зімовых і з 2025 года для летніх відаў спорту ўведзены новы класіфікацыйны кодэкс. Згодна з ім, адна з найбольш распаўсюджаных прычын парушэння зроку — высокая ступень міяпіі (блізарукасці) — больш не ўваходзіць у спіс захворванняў, якія дазваляюць атлетам удзельнічаць у Паралімпіядзе.
Як адзначыў Шудзейка, гэтае новаўвядзенне ўдарыла і па Ігару Бокію, які цяпер страціў магчымасць выступаць на міжнародным паралімпійскім узроўні.
Ён таксама паведаміў, што Бокій разглядае магчымасць заняцца трэнерствам, хоць для гэтага неабходна атрымаць адпаведную адукацыю — на сёння ён мае дыплом юрыста. Але і спартыўным функцыянерам ён можа стаць, дадаў Шудзейка.
Ігару Бокію 31 год. Ён удзельнічаў у чатырох Паралімпійскіх гульнях і заваяваў 21 залаты медаль. На Паралімпіядзе ў Парыжы ў 2024 годзе спартсмен атрымаў пяць узнагарод. У 2024 годзе яго адзначылі ордэнам Айчыны II ступені.
Агулам ён атрымаў ад Беларусі прызавымі 1 мільён і 26 тысяч даляраў.