У Крупках моцны вецер зрываў дахі са шматпавярховікаў
Над Крупкамі сёння пранёсся моцны ўраганны вецер, які літаральна зрываў дахі з будынкаў, піша «Мінская праўда».
Па інфармацыі сведкаў, прыкладна а 16‑й гадзіне парывы ветру пашкодзілі дахі як мінімум двух шматпавярховых дамоў — на завулку Магістральным, 7 і на вуліцы Чарняхоўскага, 17. Сведкі расказваюць, што гук трэску быў вельмі моцны. Перад тым надвор’е было звычайным асеннім — з лёгкім дажджом, а потым раптоўна ўзняўся моцны вецер.
Улады горада просяць жыхароў па магчымасці не падыходзіць блізка да пашкоджаных будынкаў, бо дамы цяпер паўразабраныя. Намесніца старшыні Крупскага райвыканкама Ірына Шаблоўская адзначыла, што адміністрацыя і аварыйныя службы ўжо прыступілі да ліквідацыі наступстваў урагану. Найперш робіцца ўсё для бяспекі жыхароў: абгароджваюцца небяспечныя зоны, часова аднаўляецца дахавае пакрыцце, прыбіраюцца канструкцыі, якія ўпалі.
Далей плануецца аднаўленне інфраструктуры і фасадаў. Для гэтага будуць выкарыстоўвацца спецыяльныя пад’ёмныя механізмы і вышкі, праца якіх будзе арганізавана днём і з улікам надвор’я, каб забяспечыць бяспеку як рабочых, так і жыхароў. Ацэнка памеру шкоды праводзіцца аператыўнымі групамі.
Чытайце таксама:
На нядзелю абвешчаны аранжавы ўзровень небяспекі з-за моцнага ветру
У панядзелак чакаецца мокры снег
У Беларусь прыйдзе дажджлівае надвор'е, а потым яшчэ больш пахаладае