У Расіі спрабуюць адрадзіць «Волгу». Нехта засняў новую мадэль — гэта копія Geely
Пра планы адрадзіць выпуск аўтамабіляў пад брэндам «Волга» ўсур'ёз загаварылі яшчэ летам 2022 года, пасля таго як сусветныя аўтавытворцы пачалі сыходзіць з Расіі ў адказ на ваенную агрэсію супраць Украіны.
Другое адраджэнне
Першы раз «новыя» Volga прэзентавалі ў маі 2024 года. Тады ў Ніжнім Ноўгарадзе паказалі адразу тры новыя аўтамабілі Volga: седан Volga С40 і два красоверы Volga К30 і Volga К40.
Праўда, па факце, публіцы паказалі не нешта новае, а тры аўтамабілі кітайскага брэнда Changan, толькі выпушчаныя пад расійскім брэндам.
Volga C40 і Volga K30, якія прэзентвалі вясною 2024 года. Фота: Максім Стулаў / Ведамасці
Ад арыгінальных мадэляў расійскія «Волгі» адрозніваліся толькі радыятарнай рашоткай і шыльдзікамі. Першым планавалі наладзіць выпуск седана С40, выпуск красовераў К30 і К40 быў запланаваны на пачатак 2025 года.
Але планы засталіся планамі, і выпуск кітайскіх Changan пад расійскім брэндам так і не пачаўся. Пазней сталі гаварыць, што нібыта новым партнёрам стане Geely.
Днямі гэтым размовам знайшлося пацвярджэнне, калі нехта засняў «новую» мадэль Volga пры разгрузцы.
Новая «Волга». Скрыншот: TAGAZ: Автожурнал / Telegram
Адроджанай Volga аказаўся новы Geely Atlas. Адзінае адрозненне ад арыгінальнай Geely — шыльдзікі на рашотцы радыятара, крышцы багажніка і калпачках на колавых дысках.
Новая «Волга». Скрыншот: TAGAZ: Автожурнал / Telegram
Пры гэтым на пярэднім бамперы застаўся надпіс «Geely design».
Раней па падобнай схеме ў Расіі «адрадзілі» брэнд «Масквіч», якія цяпер збіраюць на магутнасцях былога завода Renault у Маскве. Як і ў выпадку з «Волгай», з расійскага там толькі назва, а па факце — кітайскі JAC.
У нулявыя Волга была амерыканкай
Адметна, што ў гэтага расійскага аўтавытворцы ўжо быў досвед выпуску іншамарак пад уласным брэндам. Так, у 2008‑2010 гады на магутнасцях завода ў Ніжнім Ноўгарадзе наладзілі выпуск седана Volga Siber, які з'яўляўся копіяй Chrysler Sebring другога пакалення. Той выпускаўся ў Штатах з 2000 па 2006 год.
Chrysler Sebring і Volga Siber. Фота: av.by
Тады першапачаткова планавалася, што ў 2008 годзе будзе выпушчана 10 000 аўтамабіляў Volga Siber, а ў 2009‑м — 45 000. Рэальныя лічбы вытворчасці аказаліся куды больш сціплымі. У перыяд з 2008 па 2010 гады было выпушчана ўсяго 8933 адзінкі Volga Siber.
На гэтым вытворчасць аўто пад брэндам Volga спынілася. Калі браць чыстакроўныя «Волгі», то іх перасталі выпускаць яшчэ раней — у 2009-м.
Апошняя сапраўдная «Волга». ГАЗ-31105. 2003‑2009 гадоў выпуску. Фота: av.by
Так выглядала апошняя арыгінальная мадэль «Волга», праўда, і ў ёй у апошнія гады выпуску ўсталёўвалі ўжо матор ад Chrysler.