Фонд Карпянкова «Маладая гвардыя» працаўладкоўвае жонак губазікаўцаў. Якія там заробкі?
Дабрачынны фонд «Маладая гвардыя», створаны па ініцыятыве намесніка кіраўніка МУС Мікалая Карпянкова для «развіцця вайскова-патрыятычнага руху», стаў месцам працаўладкавання для сваякоў самога генерала і жонак яго калегаў-сілавікоў, высветліла «Бюро».
Адкрыццё фонду «Маладая гвардыя» ў маі 2024 года. Крыніца: vvmvdrb / Telegram
Фонд, які пазіцыянуе сябе як «парасонавы аператар» вайскова-патрыятычных клубаў, быў заснаваны ў маі 2024 года пад эгідай дзяржаўна-грамадскага аб'яднання «Беларускае таварыства «Веды», якое ўзначальвае прапагандыст Вадзім Гігін.
Дзякуючы звесткам, атрыманым ад «Кіберпартызан», расследавальнікі высветлілі, хто працуе ў штаце фонду.
Галоўная знаходка: у фондзе «Маладая гвардыя» на 2024 год працавала спецыялісткай па маркетынгу нявестка Карпянкова. Аксана Карпянкова — жонка Ігара Мікалаевіча Карпянкова, сына цяперашняга намесніка кіраўніка МУС. Яе прынялі ў верасні 2024 года, і раней яна ніяк не была звязаная з патрыятычным выхаваннем і моладдзю.
Але гэта не ўвесь «зорны склад». У розны час у штаце фонду працавалі і працягваюць працаваць жонкі дзейных сілавікоў, у тым ліку былых саслужыўцаў Карпянкова па ГУБАЗіКу, які ён узначальваў да прызначэння намеснікам міністра.
Дар’я Арлоўская — доктарка, у фондзе з мая 2024-га. Яна жонка Вячаслава Арлоўскага, які ў 2021 годзе, будучы начальнікам аддзела ГУБАЗіКа, прапанаваў пазбаўляць грамадзянства беларусаў, якія выступаюць супраць рэжыму Лукашэнкі.
Яшчэ адна жонка экс-калегі Карпянкова — Вольга Бушыла — сама афіцэрка МУС: служыла ў ГУУС Мінгарвыканкама і АГіМ Ленінскага раёна Мінска. Яна жонка супрацоўніка ГУБАЗіКа Ігара Бушылы, які, паводле паведамленняў пратэстных тэлеграм-каналаў, браў удзел у пераследзе палітычных апанентаў рэжыму Лукашэнкі.
Ганна Шыг — выпускніца Брэсцкага дзяржаўнага ўніверсітэта, працавала ў дзіцячым садку і ў мінскім педагагічным універсітэце. З ліпеня 2024‑га — у «Маладой гвардыі». Муж — Руслан Шыг, камандзір узвода в/ч 3214.
Аліна Шаюнова — лейтэнантка, майстарка спорту міжнароднага класа па кіданні молата — жонка Юрыя Шаюнова, лёгкаатлета, лейтэнанта ўнутранай службы і члена спартовай каманды ўнутраных войск МУС.
Лізавета Прадуха, 2006 года нараджэння, у фондзе з ліпеня 2024-га. Ейны бацька — намваенкама, начальнік мабілізацыйнага аддзела, падпалкоўнік Міхаіл Прадуха.
Алена Данілюк-Неўмяржыцкая — маёр МУС, служыць у спецназе ўнутраных войскаў (в/ч 3214). Неаднаразовая прызёрка па стральбе і мнагабор’і. Брала ўдзел у зборнай МУС на SWAT Challenge у Дубаі і ў алімпійскай зборнай.
Лічыліся ў штаце і былыя выхаванкі ВПК. Напрыклад, Дар’я Вяргейчык знаходзілася ў ВПК «Адвага» на базе асобнага атрада спецпрызначэння «Рысь». Цяпер яна працаўладкаваная ў фондзе і в/ч 3214 — спецназе МУС.
Як бачым, на сродкі дабрачыннага фонду жывуць жонкі цяперашніх і былых калег Мікалая Карпянкова і дзейныя сілавікі з падначаленых яму частак. Акрамя таго, фонд набірае «маладую змену» з тых, хто ўжо прайшоў школу ВПК — падрыхтаваных і лаяльных з парогу.
Колькі каштуе фонду персанал?
Аналіз справаздачнасці фонду паказаў, што за 2024 год на штат з падаткамі было выдаткавана 308 899 рублёў, што складае 42% усіх выдаткаў фонду.
Большасць супрацоўнікаў аформленыя на 0,5 стаўкі. Да прыкладу, дырэктар фонду за сваю палову стаўкі ў фондзе атрымлівае 3 493 рублі за месяц. Калі б ён меў поўную стаўку, аплата па якой склала б 6 986 рублёў, гэта было б у 2,5 разу больш за сярэднюю намінальную налічаную зарплату па краіне.
У астатніх пазначаныя зарплаты: ад 2 315 да 2 674 рублёў.