За павольны інтэрнэт у Беларусі будуць штрафаваць
У Мінсувязі прызнаюць: колькасць скаргаў сапраўды вырасла.
Ілюстрацыйны здымак. Фота: сацсеткі
Беларусы апошні год часцей сталі скардзіцца на інтэрнэт. Першы намеснік міністра сувязі і інфарматызацыі Павел Ткач расказаў у эфіры СТБ, што колькасць скаргаў сапраўды вырасла, паколькі вырасла нагрузка на сетку. Пачалося гэта ў перыяд пандэміі, калі многія пачалі працаваць дыстанцыйна, у тым ліку і з вёсак.
Чыноўнік нагадаў, што згодна з указам № 335 аператары павінны рэінвеставаць частку прыбытку ў развіццё сетак.
У Мінсувязі ўпершыню ўстанавілі нормы якасці па хуткасці інтэрнэту.
«З 1 студзеня, калі па выніках вымярэнняў будзе вызначана, што якасць аказання паслуг нездавальняючая, не адпавядае вызначаным патрабаванням, аператары будуць несці адказнасць, у тым ліку штрафавацца», — сказаў Ткач.
Каб палепшыць інтэрнэт за горадам, павялічваюць колькасць базавых станцый — цяпер іх будуць ставіць практычна ў два разы хутчэй.