Хакеры ўзламалі 120 000 хатніх камер і прадавалі з іх сексуальны кантэнт
У Паўднёвай Карэі арыштавалі чатырох чалавек, якія ўзламалі больш за 120 000 відэакамер у дамах і на прадпрыемствах, каб ствараць сексуальны кантэнт для замежнага сайта, піша Бі-бі-сі.
Паліцыя абвясціла пра арышты, заявіўшы, што абвінавачаныя скарысталіся ўразлівасцямі IP-камер, напрыклад простымі паролямі.
IP-камеры, таксама вядомыя як хатнія камеры, з’яўляюцца таннай альтэрнатывай класічнаму відэаназіранню. Іх падключаюць да інтэрнэту і звычайна ставяць для бяспекі або кантролю за дзецьмі і жывёламі.
Праваахоўнікі паведамілі, што камеры ўзламалі ў прыватных дамах, у караоке-пакоях, у студыі пілатэсу і ў гінекалагічнай клініцы.
У заяве, апублікаванай Нацыянальным агенцтвам паліцыі Паўднёвай Карэі, гаворыцца, што чацвёра падазраваных дзейнічалі незалежна адзін ад аднаго і не знаходзіліся ў змове.
Аднаго з іх абвінавачваюць ва ўзломе 63 000 камер і стварэнні 545 відэаролікаў з сэксуальнай эксплуатацыяй, якія ён затым прадаў за віртуальныя актывы. Іншы падазраваны нібыта ўзламаў 70 000 камер і прадаў 648 відэа.
Двое падазраваных узялі на сябе адказнасць прыкладна за 62% відэа, апублікаваных летась на адным сайце, які незаконна распаўсюджваў відэа са ўзламаных IP-камер.
Паліцыя цяпер прымае меры для блакавання і закрыцця гэтага сайта, а таксама супрацоўнічае з замежнымі агенцтвамі для расследавання дзейнасці яго аператара. Таксама арыштавалі трох чалавек, якіх падазраюць у куплі і праглядзе гэтых матэрыялаў.
«Узлом IP-камер і незаконная здымка наносяць велізарныя пакуты ахвярам і таму з’яўляюцца сур’ёзнымі злачынствамі. Мы будзем выкараняць іх з дапамогай дэталёвых расследаванняў», — сказаў Пак У Хён, кіраўнік аддзела кіберрасследаванняў Нацыянальнага агенцтва паліцыі.
«Прагляд і захоўванне незаконна знятых відэа таксама з’яўляецца сур’ёзным злачынствам, таму мы будзем актыўна расследаваць і такія выпадкі». Улады асабіста наведалі і паведаміўшы ахвярам у 58 месцах, даўшы ім рэкамендацыі адносна змены пароляў.
Яны таксама дапамагаюць ахвярам выдаляць і блакаваць кантэнт і працуюць над выяўленнем іншых людзей, якія маглі пацярпець.
«Перш за ўсё, надзвычай важна, каб асобныя карыстальнікі, якія ўсталявалі IP-камеры ў дамах або камерцыйных памяшканнях, заставаліся пільнымі і неадкладна і рэгулярна змянялі свае паролі доступу», — гаворыцца ў заяве паліцыі.