У 10 гарадах Гродзенскай вобласці цяпер можна расплаціцца агульнай картай «Бусел»
З 22 студзеня «Гроднааблаўтатранс» запускае новую сістэму аплаты праезду ў 10 гарадах Гродзенскай вобласці: Ліда, Слонім, Ваўкавыск, Смаргонь, Навагрудак, Ашмяны, Шчучын, Астравец, Масты, Скідзель, паведамляе «Гродзенская праўда».
Для аплаты праезду ў гарадскіх аўтобусах дастаткова проста прыкласці транспартную карту «Бусел» да валідатара.
Перад пачаткам паездкі кіроўца актывуе сістэму, прыклаўшы да валідатара сваю спецыяльную карту. Далей пры ўваходзе ў аўтобус пасажыр падносіць транспартную карту «Бусел» да валідатара — прылада менш чым за 1 секунду зафіксуе аплату і адлюструе адзін з наступных экранаў:
-
Зялёны — аперацыя паспяховая, з карты спісваецца кошт білета на адну паездку;
-
Чырвоны — памылка або няўдалая спроба. Магчыма, на карце «Бусел» скончыліся запісаныя паездкі або яна пашкоджаная;
-
Жоўты — праезд ужо аплачаны. Па транспартнай карце «Бусел» дапускаецца аплата праезду толькі за аднаго пасажыра. Пры спробе аплаціць праезд за некалькіх чалавек аперацыя будзе аўтаматычна адхілена сістэмай.
Кантралёр падчас праверкі аплаты праезду перавядзе валідатары ў рэжым кантролю, што прывядзе да іх блакіроўкі. Пасажыру неабходна прад’явіць кантралёру сваю карту, прыклаўшы яе да спецыяльнай мабільнай прылады з усталяванай праграмай.
Інфармацыю пра колькасць астатніх паездак можна будзе даведацца, прыклаўшы транспартную карту «Бусел» да валідатара.