«Беларусь нельга страчваць для Еўропы, але гэту асобу страціць дакладна варта». Зяленскі патлумачыў, чаму ўвёў санкцыі супраць Лукашэнкі
Палову свайго традыцыйнага вечаровага звароту прэзідэнт Украіны Уладзімір Зяленскі 18 лютага прысвяціў тлумачэнню, чаму ён увёў санкцыі супраць Аляксандра Лукашэнкі і чаму гэта адбылося менавіта цяпер.
Уладзімір Зяленскі. Фота: Sean Gallup / Getty Images
«Мы адказваем такім рашэннем на відавочна большае ўцягванне Беларусі ў вайну Расіі супраць Украіны. Лукашэнка прызвычаіўся гандляваць суверэнітэтам сваёй дзяржавы і здаў шмат інтарэсаў Беларусі. Здаў расіянам. Нават паўнамаштабную вайну Расія прынесла ва Украіну ў тым ліку з тэрыторыі Беларусі — гэта факт.
Але на працягу доўгага часу Лукашэнка ўсё ж такі ўстрымліваўся ад прамых жорсткіх дзеянняў на карысць Расіі.
Аднак з восені мінулага года Украіна фіксуе на тэрыторыі Беларусі рэтранслятары, якія працуюць на падтрымку ўдарных дронаў.
Менавіта дзякуючы гэтым рэтранслятарам Расія здзяйсняла ўдары па нашых паўночных рэгіёнах — ад Кіева і Кіеўскай вобласці да Валынскай вобласці. Гэта былі ўдары па энергетыцы, па нашай чыгунцы.
Таксама, на жаль, Лукашэнка працягвае падыгрываць Пуціну ў ягонай небяспечнай палітычнай гульні з «Арэшнікам». Гэта агульнаеўрапейская пагроза. Таксама Беларусь і надалей выкарыстоўваюць як базу забеспячэння кампанентаў, абсталявання, тэхнікі для расійскай арміі.
Па сукупнасці ўсяго гэтага мы таксама мяняем палітыку і будзем адказваць адэкватна пагрозе. У Мінску павінны гэта разумець. Ёсць гэты палітычны сігнал з санкцыямі.
Я даручыў таксама ўважліва вывучыць усе схемы Лукашэнкі і яго паплечнікаў.
Мы будзем супрацьдзейнічаць больш адчувальна і будзем працаваць з нашымі партнёрамі ў рэгіёне і ўсёй Еўропе, а таксама з глабальнымі партнёрамі, каб яны цалкам усведамлялі, з чым маюць справу, калі гаворка вядзецца пра рэжым у Беларусі.
Беларусь — краіну, людзей, народ, — нельга страчваць для Еўропы, але гэтую асобу, якая ставіць Беларусь на службу Расіі, дакладна варта страчваць», — заявіў прэзідэнт Украіны.
Чытайце таксама:
Чаму Украіна ідзе на абвастрэнне адносін з Лукашэнкам? Запыталі ў Ігара Кізіма
Ціханоўская вітала ўвядзенне Зяленскім санкцый супраць Лукашэнкі