З мінскай школы давялося эвакуяваць амаль паўтары тысячы чалавек
Раніцай 20 лютага з мінскай сярэдняй школы № 26 на вуліцы Льва Сапегі часова эвакуявалі каля 1 300 вучняў і 60 супрацоўнікаў. Пра гэта паведамілі ў Мінскім гарадскім упраўленні МНС. Інцыдэнт адбыўся з-за ўзгарання ў будынку школы, піша выданне «Мінск-Навіны».
Скрыншот з відэа
Сігнал пра ўзгаранне паступіў ратавальнікам праз сістэму «Маланка», пасля чаго яны адразу выехалі на месца. У будынку таксама спрацавала сістэма галасавога апавяшчэння. Да прыбыцця супрацоўнікаў МНС адміністрацыя школы самастойна арганізавала эвакуацыю дзяцей і дарослых.
Пасля абследавання высветлілася, што загарэлася сушылка для рук у санвузле на другім паверсе. Прычыны здарэння цяпер высвятляюцца. Узгаранне ліквідавалі яшчэ да прыезду пажарных. Пацярпелых няма.