«Мы пачалі гэту вайну пад уплывам ізраільскага лобі». Дырэктар Антытэрарыстычнага цэнтра ЗША пайшоў у адстаўку ў знак пратэсту
Кіраўнік Нацыянальнага контртэрарыстычнага цэнтра ЗША Джо Кент падаў у адстаўку, бо не пагадзіўся з вайной супраць Ірана. Пра сваё рашэнне ён паведаміў у сацсетцы X.
Джо Кент. Фота: Wikimedia Commons
«Пасля доўгіх роздумаў я прыняў рашэнне пайсці ў адстаўку з пасады дырэктара Нацыянальнага контртэрарыстычнага цэнтра, пачынаючы з сённяшняга дня. Я не магу з чыстым сумленнем падтрымліваць вайну ў Іране, якая працягваецца. Іран не ўяўляў непасрэднай пагрозы для нашай краіны, і відавочна, што мы пачалі гэту вайну пад ціскам Ізраіля і яго ўплывовага амерыканскага лобі», — напісаў Джо Кент.
Сваю заяву аб адстаўцы ён накіраваў прэзідэнту ЗША.
Нацыянальны контртэрарыстычны цэнтр — гэта структура, якая займаецца аналізам і каардынацыяй барацьбы з тэрарызмам паміж рознымі амерыканскімі ведамствамі. Ён уваходзіць у сістэму нацыянальнай разведкі і падпарадкоўваецца яе кіраўніку. Цэнтр быў створаны ў 2004 годзе, каб пасля тэракта 11 верасня 2001 года палепшыць узаемадзеянне амерыканскіх спецслужбаў.
Чытайце таксама:
Іранскія СМІ апублікавалі запіску ад Алі Ларыджані
Новы лідар Ірана адхіліў прапановы ЗША аб спыненні вайны
Ізраіль заяўляе, што забіты кіраўнік іранскай арганізацыі «Басідж», якая падаўляе пратэсты
Маджтаба Хаменеі выжыў падчас абстрэлу Ізраіля, бо выйшаў у той момант з дому