Крыніца: Беларусь можа запрасіць крэдытную лінію МВФ у выпадку расійскага ціску

Памер прэвентыўнай крэдытнай лініі можа скласці каля 2,95 млрд даляраў з павелічэннем да $5,9 млрд праз 12 месяцаў.

Беларусь разгледзіць магчымасць прыцягнення страхавых сродкаў Міжнароднага валютнага фонду (МВФ) у выглядзе прэвентыўнай крэдытнай лініі (Precautionary Credit Line, ПКЛ), паведаміў агенцтву «Інтэрфакс-Захад» адзін з беларускіх удзельнікаў пасяджэння Рады кіраўнікоў МВФ і Сусветнага банка, якое прайшло ў Вашынгтоне.

У паседжанні Рады МВФ бралі ўдзел старшыня Нацбанку Пятро Пракаповіч і віцэ-прэм’ер Андрэй Кабякоў. Такім чынам, крыніцай мог быць хтосьці з іх або высокапастаўлены супрацоўнік спецслужбаў, які меў дачыненне да арганізацыі перамоваў.

«У лістападзе гэтага года чакаецца місія МВФ. Падчас місіі мы плануем абмяняцца ідэямі адносна далейшых перспектыў супрацоўніцтва з фондам. У прыватнасці, не выключаецца абмеркаванне магчымасці прадастаўлення Беларусі прэвентыўнай крэдытнай лініі», — сказаў суразмоўца.

Са словаў інфарматара лукашэнкаўскага агенцтва, сродкі МВФ у выглядзе ПКЛ кампенсуюць «магчымыя знешнія шокі». Гаворка ідзе пра рэзкае павелічэнне цэнаў на расейскія энерганосьбіты, у выпадку далейшага пагаршэння адносінаў з Расеяй

ПКЛ, у адрозненне ад крэдыту стэнд-бай, — гэта не жывыя грошы, а патэнцыйная магчымасць скарыстацца крэдытам у выпадку ўзнікнення надзвычайнай сітуацыі. Ніякіх спецыяльных умоваў пры гэтым не выстаўляецца.

Прэвентыўная крэдытная лінія — гэта зусім новы механізм МВФ, распрацаваны ў мінулым верасні. ПКЛ могуць адкрываць і для краінаў, эканамічная палітыка якіх не цалкам адпавядае патрабаванням МВФ.

Суразмоўца «Інтэрфаксу» падкрэсліў, што кіраўнікі МВФ высока ацэньваюць выкананне Беларуссю дамоваў па праграме stand-by. Акрамя таго, ён расказаў, што ў кастрычніцкім аглядзе сусветнай эканомікі МВФ рэзка павысіў ацэнку росту эканомікі Беларусі ў гэтым годзе — з 2,4% да 7,2%. Гэта дае беларускаму ўраду аргументы для абгрунтавання росту заробкаў у бюджэтнай сферы, які раней МВФ крытыкавала, бо не бачыла росту прадукцыйнасці працы.

У выпадку адкрыцця прэвентыўнага крэдыту МВФ будзе весці рэгулярны маніторынг прагрэсу ў праблемных сектарах. Пры гэтым краіна-пазычальніца не будзе плаціць працэнтаў па крэдыце, калі патрэбы ў скарыстанні ёю не ўзнікне.

Фактычна,

з вылучэннем ПКЛ Беларусь будзе застрахаваная ад сітуацый кшталту ліпеньскай, калі краіна элементарна не мела свабодных грошай, каб заплаціць па раптоўных рахунках «Газпрому».

Нагадаем, што МВФ вылучыў Беларусі крэдыт стэнд-бай на $ 3,46 млрд для ўмацавання нацыянальнай фінансавай сістэмы ў часе крызісу (587,4% ад краінавай квоты).

Цікава, што

опцыяй ГКЛ дагэтуль скарысталіся тры краіны — Мексіка, Польшча, Калумбія. Усе тры з’яўляюцца асабліва блізкімі саюзніцамі ЗША. Памер ПКЛ для Беларусі можа скласці каля 2,95 млрд даляраў з павелічэннем да $5,9 млрд праз 12 месяцаў.

Каментары да артыкула