Нацбанк двойчы парушыў указ Лукашэнкі

За май месяц ведамства Героя Беларусі Пятра Пракаповіча паспела двойчы парушыць указ Аляксандра Лукашэнкі. Узніклую прававую калізію у Нацбанку каментаваць адмаўляюцца.

Такім чынам, дэвальвацыя нацыянальнай валюты амаль на 55% праведзена пастановай Нацбанка № 188, якая падпісаная Пятром Пракаповічам і ўзгоднена з прэм’ер-міністрам Міхаілам Мясніковічам і старшынёй Камітэта дзяржкантролю Аляксандрам Якабсонам.

Між тым, як паведамляе interfax.by, да цяперашняга часу захоўвае прававую сілу ўказ прэзідэнта № 597 ад 19 лістапада 2010 года, якім зацверджаныя асноўныя напрамкі грашова-крэдытнай палітыкі на 2011 год. Згодна з ім, ваганні курсу беларускага рубля да кошыка валют у 2011 годзе не могуць перавышаць ±8% да кошту кошыка валют.

Пры гэтым аказваецца, што пастанова аб дэвальвацыі стала ўжо другім парушэннем Нацбанкам вышэйзгаданага ўказу. Бо пастановай № 168 ад 5 мая 2011 года Нацыянальны банк пашырыў калідор ваганняў курсу беларускага рубля да кошыка валют з ±8% да ўзроўню на пачатак года да ±12%.

Атрымліваецца, за май месяц Нацбанк прыняў два нарматыўныя прававыя акты, якія супярэчаць указам прэзідэнта.

Начальнік упраўлення інфармацыі — прэс-сакратар Нацбанка Анатоль Драздоў пацвердзіў interfax.by, што ўказ прэзідэнта № 597 з’яўляецца дзеючым, але узніклую прававую калізію каментаваць адмовіўся.

Каментары да артыкула