Лукашэнка: Накормлены народ не будзе пратэставаць супраць улады
І зноў назваў палітычных праціўнікаў «пятай калонай».
Аляксандр Лукашэнка ўпэўнены ў тым, што забяспечаныя самым неабходным, у тым ліку харчаваннем, людзі не будуць дэстабілізаваць абстаноўку ў краіне.
«Вось, наша пятая калона спрабуе разгайдаць нашу дзяржаву. Ніколі нічога не ўдасца, калі ў цябе грамадзянін накормлены і апрануты», — заявіў Лукашэнка ў сераду ў ходзе рабочай паездкі ў Мінскую вобласць на нарадзе па актуальных пытаннях сельскагаспадарчай галіны.
«Ніякага разварушвання не будзе, тым больш беларусы — не дурныя людзі. Яны памятаюць, што было ў савецкі час.
Бачылі, што было 10 гадоў таму, і бачаць, што ёсць цяпер», — адзначыў ён.
«Так, мы не ўсё зрабілі. Але хацелася б бачыць тую дзяржаву, якая ўсё зрабіла», — сказаў А. Лукашэнка. Пры гэтым ён дадаў: «Мы ведаем, як трэба рабіць, і сказалі, у якія тэрміны мы гэта зробім».