Полацкія рабочыя адмовіліся карміць прафсаюз
Рабочыя «Полацк-Шкловалакно» пакідаюць афіцыйны прафсаюз. Толькі ў цэху №12 каля сотні рабочых цягам месяца напісалі заявы ў бухгалтэрыю, каб з іх больш не вылічалі прафсаюзныя ўзносы.
Прычыны незадавальнення рабочых — нізкія заробкі, кепскія ўмовы працы ды іншыя праблемы, якія афіцыйны Белхімпрафсаюз не вырашае.
Кіраўнік суполкі незалежнага прафсаюза прадпрыемства Віктар Стукаў: «Пакуль да нас прыйшлі толькі 2 чалавекі, хоць з прадзяржаўнага прафсаюза выйшлі некалькі дзясяткаў. Справа ў тым, што абстаноўка вельмі цяжкая, на рабочых ціснуць псіхалагічна — пагражаюць праблемамі, калі далучацца да Свабоднага прафсаюза. Напачатку, калі людзі прыходзілі да нас раіцца, мы казалі так: "Далучаецеся да нашай суполкі — значыць, аўтаматычна пакідаеце той прафсаюз".
Але людзей запалохалі, і мы прапанавалі ім іншае выйсце — проста адмовіцца плаціць унёскі. Так яны і зрабілі, і цяпер на прадпрыемстве пад сотню людзей, якія не ўваходзяць ні ў які прафсаюз.Яны чакаюць, што будзе далей. Але мы перакананыя, што дамагчыся чагосьці лягчэй супольнымі намаганнямі».
Сёлета актывісты Свабоднага прафсаюза ўласным прыкладам паказалі, як можна змагацца за тое, каб заробкі выплочваліся ў поўным аб’ёме. Для гэтага давялося судзіцца з адміністрацыяй прадпрыемства.
У пачатку месяца, 7 кастрычніка, прадстаўнікі суполкі Свабоднага прафсаюза збіраліся правесьці ў Полацку пікет, прымеркаваны да Сусветнага Дня дзеянняў за годную працу. Аднак Полацкі гарвыканкам адмовіў заяўнікам у правядзенні гэтай акцыі.