Bykaŭ nie dla prodažu
Vyjšli pieršyja try tamy z poŭnaha zboru tvoraŭ Vasila Bykava.
Maštabny prajekt realizuje hramadzkaja inicyjatyva «Vola narodu» pry ŭdziele Sajuzu biełaruskich piśmieńnikaŭ.
Kaardynatar prajektu, staršynia SBP Aleś Paškievič nazyvaje hety prajekt ahulnahramadzkim. Zaduma vydać poŭny zbor tvoraŭ piśmieńnika była ahučana dva hady tamu, kali adbyłosia pieršaje pasiadžeńńnie pa ŭšanavańni pamiaci piśmieńnika. «Vasil tak chacieŭ ubačyć svoj zbor tvoraŭ, ale jon vyjšaŭ zapozna. Choć kažuć, što lepiej tak, čym nikoli», — havoryć Iryna Bykava, jakaja ŭvajšła ŭ redakcyjnuju kalehiju. Vydańnie rychtavałasia pa planach-praspektach, jakija paśpieŭ padrychtavać aŭtar. «Heta nieakademičny zbor, bo tvory źmiaščajucca nie ŭ chranalahičnym paradku. U pieršym tomie apublikavany apošnija pa časie napisańnia tvory — apovieści «Aŭhaniec» i «Vaŭčynaja jama», apaviadańni i prypavieści. Mienavita pieršy tom uraziŭ staršyniu SBP bolej za ŭsio. «Padčas pracy nad im ja zrazumieŭ, što Vasil Bykaŭ nia tolki piśmieńnik XX st., jaho možna ličyć mastakom XXI st. U prypavieściach jon aleharyčna asensoŭvaje sučasnaść, madeluje budučyniu», — zaznačaje A.Paškievič.
Planujecca, što ŭsiaho budzie 14 tamoŭ. U apošni buduć uklučany ŭsie teksty, jakija adšukajucca padčas pracy nad vydańniem, a taksama dychtoŭny fotaalbom na krejdavanaj papiery. «Užo znajšlisia niekatoryja zapisy Vasila, niaskončanyja tvory i zadumy», — kaža Iryna Bykava.
Kiraŭnikom prajektu vystupaje Alaksandar Kazulin. Pa jaho zadumie, zbor tvoraŭ Bykava budzie niekamercyjnym vydańniem. Uvieś nakład u 3000 asobnikaŭ pojdzie ŭ biblijateki i na padarunki.