Biełaruski fest u Berlinie
11‑22 lipienia ŭ berlinskim art‑centry «Tacheles» adbudziecca fest niezaležnaha biełaruskaha mastactva.
11‑22 lipienia ŭ berlinskim art‑centry «Tacheles» adbudziecca fest niezaležnaha biełaruskaha mastactva «Dach‑5». U jaho ramkach projdzie persanalnaja vystava Alaksandra Rodzina, muzyčnyja vystupy biełaruskich elektronnych prajektaŭ, a taksama haściej festu (u liku jakich i karyfiej narveskaha dark‑embijentu PENITENT), performansy i litaraturnyja čytańni.
«Tacheles» — miesca lehiendarnaje. Niedaremna ž turysty z usiaho śvietu vałam valać u hety vializny siamipaviarchovy kunstchauz, prahnučy akunucca ŭ jaho papraŭdzie non‑kanfarmisckuju atmasferu.
Naprykancy 80‑ych budynak, zakinuty ledźvie nie z časoŭ Druhoj suśvietnaj, byŭ zachopleny kupkaj mastakoŭ‑kontarkulturščykaŭ i pieraŭtvorany ŭ kamunu‑skvot, ale prajšoŭ peŭny čas, i hetaja inicyjatyva «lehalizavałasia» dy nabyła trochi bolš respektabelny status. Staŭšysia nieŭzabavie adnoj z berlinskich admietnaściaŭ.
Historyju biełaruskaj prysutnaści ŭ ścienach «Tachielesu» raspačynaje supolnaja vystava «Dach», zładžanaja ŭ 2001 hodzie mastakami Alesiem Taranovičam i Iharam Jermakovym. Adnym ź jaje vynikaŭ stała toje, što žyvapisiec Alaksandar Rodzin paśla svajho ŭdziełu ŭ vystavie byŭ zaprošany pracavać u «Tachieles» i nieŭzabavie staŭ adnym z samych kultavych mastakoŭ art‑centra. Jaho minułaja vystava «Kali‑iuha», što prajšła ŭ «Tachielesie» na pačatku hoda, zajmieła vializny pośpiech u berlinskich mastackich kołach. U ramkach ciapierašniaha festu zaplanavanaja novaja «persanałka» mastaka.
Sioletni «Dach» stanie pakul što najbolš pradstaŭničaj imprezaj biełaruskaj indastryeł‑sceny za miažoj. U im voźmuć udzieł takija prajekty, jak Buben, Nadin Katrin, Planet N, Kein, I Me Mine vs. Shkvarka. Da ich dałučycca ci nie ź dziasiatak haściej z roznych krain śvietu.
Pa słovach adnaho z arhanizataraŭ festu Uładysłava Bubiena, jon prosta razasłaŭ zaprašeńni da ŭdziełu ŭ im svaim šmatlikim siabram i, niahledziačy na poŭnuju niekamercyjnaść hetaj imprezy, bahata chto achvotna pahadziŭsia ŭziać u joj udzieł. Nie zapatrabavaŭ hanararu i narvežac Karsten Chamre. Padčas festu jon pradstavić nia tolki samy viadomy svoj prajekt Penitent, jaki niekali prasłaviŭsia praz ułasnyja relizy na kultavym niezaležnym łejble Cold Meat Industry, ale i mnohija inšyja ipastasi. Svajo alter ego prademanstruje i viadomy niamiecki dy‑džej Sacsha Mueller, jaki hetym razam budzie hrać eksperymentalny nojz.
A jašče ŭ ramkach festu projduć performansy hrupy ekzystencyjalnaj klaŭnady «Teatar psychičnaje nieŭraŭnavažanaści» (jakaja akurat adznačyć dziesiacihodździe svajho isnavańnia), Mitryča i Jaŭhienia Łosika, litaraturnyja vystupy Źmitra Višniova i Illi Sina. A taksama… niejkija absalutna nieprahnazavanyja pakul prajavy tvorčaj aktyŭnaści.
‑‑ Pierakanany, što ŭ «Tachielesie» biaź ich nie abydziecca, ‑‑ z chitravataj uśmieškaj adznačyŭ Aleś Rodzin. — Bałazie, sama atmasfera spryjaje.