«Narodnaja vola»: dramatyčnyja dni
28 vieraśnia «NV» atrymała listy z sajuzdrukaŭ i drukarni «Čyrvonaja zorka»: adzinaj štodzionnaj niezaležnaj hazecie krainy admaŭlajuć u druku j raspaŭsiudzie z 1 kastryčnika.
Pavodle słovaŭ namieśnicy redaktara «NV» Śviatłany Kalinkinaj, listy z «Sajuzdrukaŭ» napisanyja niby pad kapirku: «Z nami razarvali damovy ŭ «suviazi z publikacyjaj u ŚMI materyjałaŭ, jakija supiarečać zakanadaŭstvu».
Drukarnia ŭ admovie spasłałasia na zapazyčanaść: «NV» nie spłaciła za druk 2 młn rub. Kalinkina ličyć hetuju padstavu niesurjoznaj: «Było takoje, što my raźličvalisia z drukarniaj adrazu za ceły miesiac. Ale tut uźnikła prablema, bo ŭ nas hetymi dniami zablakavali rachunak».
27 vieraśnia hazeta źviarnułasia da hramadzkaści z prośbaj dapamahčy spłacić 100 miljonaŭ rubloŭ kampensacyi lideru Liberalna-demakratyčnaj partyi S.Hajdukieviču ŭ adpaviednaści z rašeńniem sudu. U advarotnym vypadku hazeta moža spynić vychad. Jaje majomaść apisanaja, aryštavanaja papiera. Bankaŭski rachunak «NarVoli» zablakavany. U minuły raz, kali nad hazetaj navis štraf pa spravie Rybakova, jaje vyručyli rasiejskija biznesoŭcy biełaruskaha pachodžańnia. Ale tady suma była ŭdvaja mienšaja.
Pavodle acenak pravaabaroncaŭ, arhumenty S.Hajdukieviča ŭ sudzie nie byli pierakanaŭčymi, a suma štrafu nieadekvatnaja. Tym nia mienš, abskardzić rašeńnie nie ŭdałosia.
U vydańnia jość mahčymaść vyjści ŭ čaćvier i piatnicu, 29 i 30 vieraśnia. Jak sytuacyja budzie raźvivacca dalej, nieviadoma.
Ułady mohuć abyścisia z «Narodnaj volaj» pa varyjancie «BDH» i pa varyjancie «Tovariŝa». Pieršym adrezali ŭsie varyjanty raspaŭsiudu. Druhim dazvolili zachavać padpisku. Ciažka skazać, što mienš pakutliva.
Jak ža ŭłady zbajalisia zhurtavańnia apazycyi, kali ŭ dzień Kanhresu rujnujuć apošni bastyjon svabody słova ŭ krainie.