Z usioj krainy
Zajac varyć kavu
Prezentacyja litaraturna-mastackaha zbornika «O, radzima, moj śvietač cudoŭny…» adbyłasia ŭ Aršanskim muzei U.Karatkieviča i była prymierkavanaja da 75-hodździa z dnia naradžeńnia klasyka. Zbornik bahata azdobleny malunkami z krajavidami Karatkievičavych miaścin (aŭtar — mastak-hrafik ź Vialejki Ŭładzimier Łukša).
Upryhažeńniem imprezy staŭ vystup dziciačaha ekalahičnaha teatru «Praleska» SŠ №20. Vučni 4-j klasy pad kiraŭnictvam nastaŭnicy Śniažany Biełahorcavaj ź vialikim impetam pakazali spektakl «Zajac varyć kavu» (pra piva małodšym školnikam jašče rana viedać. — Ja.Ž.) pavodle vieršaŭ i kazak Karatkieviča. Što vielmi pryjemna, vučni rasiejskamoŭnaj škoły (u Voršy niama ciapier nivodnaj biełaruskamoŭnaj klasy) cudoŭna hrali na movie aryhinału. Zdajecca, choć hetym słavuty ziamlak byŭ by ŭściešany.
Psychdyspanser da «Dažynak»
U Voršy spravili ŭłaziny supraćsuchotny dy psychaneŭralahičny dyspansery, jakija z adnapaviarchovych draŭlanych chacin davajennaj pabudovy pierajechali ŭ trochpaviarchovy budynak. Siarod mieścičaŭ chvorych na suchoty šmat: ich rehularna «pastaŭlajuć» ilnokambinat dy dźvie vializnyja aršanskija turmy. U adnoj z turmaŭ mieścicca respublikanskaja supraćsuchotnaja bolnica, kudy zvoziać chvorych z usich papraŭčych kalonij. Nia mienš pacyjentaŭ i ŭ psychdyspansery. Vystupajučy z pramovaj na cyrymonii adkryćcia, staršynia Viciebskaha abłvykankamu Ŭładzimier Andrejčanka zaznačyŭ, što, mahčyma, u 2008 h. u Voršy projduć respublikanskija «Dažynki» (burnyja praciahłyja apladysmenty). Sapraŭdy, i Dzień biełaruskaha piśmienstva, i Usiebiełaruski ekalahičny forum, što ładzilisia ŭ Voršy, kančatkova horad da ładu nie daviali. Usie spadziavańni na śviata ŭradžaju. Voś tolki ci budzie jano padobnaje na papiarednija, zaležyć ad vynikaŭ hałasavańnia ŭ 2006 h. Ale pra heta na mitynhu maŭčali.
Jaŭhien Žarnasiek, Vorša
∎
Horad juveliraŭ
Na placy Voli ŭ Połacku ščyrujuć archieolahi. Kiruje raskopkami vykładčyk universytetu Dzianis Duk. Štodnia praca prynosić znachodki, i sp.Duk miarkuje, što na hetym miescy ŭ XVII st. mieściłasia juvelirnaja majsternia, bo ciapier traplajecca šmat askiepkaŭ tyhlaŭ i roznych vyrabaŭ z bronzy i spłavaŭ. Znajšli navat zroblenaje z kostki łasinaha roha pisała. Padobnaja znachodka ŭ Połacku raniej nie traplałasia. Pry kancy 1980-ch u horadzie raskapali vialikuju majsterniu załatara siar.XII —pač.XIII st. Historyk Siarhiej Tarasaŭ vykazvaŭ tady versiju, što heta, mahčyma, byŭ «ofis» samoha Łazara Bohšy.
Lavonpal i vakolicy
14 kastryčnika ŭ Połackaj dziciačaj mastackaj škole adkryłasia ekspazycyja pa vynikach pleneru maładych mastakoŭ «U pošukach Atlantydy: Lavonpal». Mastackaja akcyja adbyłasia ŭ žniŭni ź inicyjatyvy połackaj paetki Lery Som, a natchnicielem pleneru staŭ paet Siarhiej Paniźnik — vialiki patryjot Drysienščyny i Miorščyny. Mastaki malavali krajavidy Lavonpalu (Miorski rajon), miascovych žycharoŭ.
Pra Sacharava zhadali na radzimie
14 kastryčnika ŭ haradzkoj biblijatecy imia Skaryny adbyłasia viečaryna ŭ honar 125-hodździa falklarysta, etnohrafa, pedahoha, historyka Siarhieja Sacharava. Sacharaŭ naradziŭsia ŭ siamji dziaka, jaki słužyŭ pry Połackim kadeckim korpusie. Los źviazaŭ jaho z Łathalijaj, dzie jon nastaŭničaŭ, udzielničaŭ u kulturna-aśvietnym ruchu, źbiraŭ falklornyja materyjały ŭ asiarodku biełarusaŭ Łatvii. U 1945 h. etnohraf, užo ŭ stałym vieku, byŭ respresavany i departavany ŭ Kazachstan.
Vasil Krokva, Połacak