Aleś Arkuš
Da hramadzianaŭ śvietu
* * *
u Žodzinie na moście
pad jakim šumić vadaspad
hladžu na hulniu pyrskaŭ
uspłyvajuć vidziežy
dziacinstva
tranślacyja praź dziesiacihodździ
Plisa aščadna
(daražyć kožnaj kropielkaj)
kocić svaje vody
u Biarezinu
vadaspad jak mytnia
kožnaja kropielka
prachodzić ahlad
niedzie tam unizie
pad zamšełym kamieniem
schavaŭsia miantuz
z maim załatym kručkom
u rocie
∎
* * *
šlach ad elektryčki
da matčynaha domu
kolki razoŭ im kiravaŭsia!
u roznyja baki
i vielmi rana-ranieńka
i ŭdzień i ŭnočy
nios dumki i mary
a jašče
matčyna błasłavieńnie
i kłopat i tryvohu
pakul hety šlach isnuje
datul ja pryviazany pupavinaj
da ciabie
moj rodny horad
∎
* * *
siabar-adnaklaśnik
zaprasiŭ da siabie ŭ hości
siadzim la stava na łavačcy
i zhadvajem maładość
pobač Plisa hajdaje na svaich chvalach
biełatvaryja lilei
a za rakoj
pačynajecca znajomy lasok —
zialonym pasam jon vyciahnuŭsia ŭ bok
karpusoŭ pijanerlahieru
u jakim štoleta ty baviŭ
volny čas svajho dziacinstva
ci rastuć zaraz u tym lasku
sunicy?
ci hrejucca na ihlistych ściežkach
jaščarki?
ci chavajucca pad maładymi jełačkami
siamiejki maślakoŭ?
ci varta ŭsio heta spraŭdžvać?
∎
* * *
na šlachu da majho letniaha damka
lažyć vialiki kamień
idučy pobač
ja zaŭsiody cikaŭna razhladaju
vałun
niaŭžo takuju dakładnuju hieametryju
jamu nadała pryroda
kali heta zrabiŭ čałaviek
dyk kamień toj moža być tolki
nadmahilnym
∎
* * *
voś i jašče adzin hod
nabližajecca da skonu
pierahladaju svoj dziońnik
zanatoŭvaju apošnija padziei
nibyta ŭ buchhałtarskaj knizie
padrachoŭvaju balans
∎
* * *
sabaku nakarmić
pryłaščyć
zazirnuć u vočy
skazać dobraje słova
vyjści na špacyr
pasłuchać jak šamaciać ildziny —
abudžanaja Dźvina
jak aviečyja statki
honić ich
na kirmaš u Ryhu
pieśnia vialikaj raki ŭ adližnuju zimu
prajścisia ŭzdoŭž bieraha
ničoha nie kranajučy
nie pakidajučy śledu
ukinuć u raku zakarkavanuju butelku
ź listom da hramadzianaŭ śvietu
Połacak