10 niezaŭvažna škodnych zvyčak — mužčynskija i žanočyja asobna
Jašče na pačatku XX stahodździa dažyć da 70 hadoŭ było vialikaj udačaj, choć ekałahičnaja situacyja była lepšaja, a ludzi ruchalisia bolš. Siońnia technałohii dazvalaje nam žyć našmat daŭžej dy kamfortniej. Ale najhoršy vorah čałavieka — heta jon sam. «Naša Niva» sabrała 10 typovych zvyčak sučasnych mužčyn i žančyn, jakija treba kidać.
1. Vysokija abcasy
Abutak na abcasach vielmi raspaŭsiudžany siarod biełarusak, šmat chto nosić vysokija abcasy štodnia. Ale zavysokija abcasy niehatyŭna ŭpłyvajuć na pastavu dy zališnie nahružajuć sustavy i mohuć vyklikać zusim niepryjemnyja nastupstvy: artryt, defarmacyju palcaŭ noh, boli ŭ śpinie, traŭmy suchažyllaŭ. Pry hetym treba pamiatać, što zvalicca z vysokich abcasaŭ vielmi lohka, asabliva ŭzimku. Nie nasicie abcasy vyšejšyja za 4 santymietry dy davajcie vašym naham adpačyć u abutku biez abcasaŭ. Taksama rekamiendujecca nasić artapiedyčnyja vuściłki.
2. Ciažkija torbački
Pieranos ciažkaściaŭ drenna adbivajecca na arhaniźmie čałavieka, a kali treba ciahać niešta praciahły čas, niehatyŭny efiekt tolki ŭzmacniajecca. Na žal, siońnia žanočyja torbački z dakumientami, noŭtbukami, płanšetami dy jašče j asabistymi rečami — nie lohkaja noša. Bolš za toje, torbački nosiać na adnym plačy ci ŭ adnoj ruce, i praz heta nahruzka na pazvanočnik raźmiarkoŭvajecca nieraŭnamierna, što ŭ vyniku moža prynieści značnuju škodu vašaj asancy dy śpinie. Kab hetaha nie adbyvałasia, pasprabujcie «vykinuć» usio niepatrebnaje. Ci možna razhledzieć varyjant pierachodu na artapiedyčny zaplečnik — «zdaraviejšy» varyjant pieranosu svajoj majomaści.
3. Stanik niapravilnaha pamieru
Ličycca, što 70% žančyn nosiać staniki nie svajho pamieru. Ale takija staniki mohuć vyklikać boli ŭ śpinie, šyi dy hrudziach, paharšajuć jakaść dychańnia, razdražniajuć skuru, parušajuć narmalny krovazvarot. Kab uniknuć mahčymych niepryjemnaściaŭ, adkazna staŭciesia da vybaru hetaj štodzionnaj častki vašaha adzieńnia.
4. Vypivać naroŭni z mužčynami
Padčas zastollaŭ ci viečaryn mnohija žančyny nie chočuć adstavać ad supraćlehłaha połu ŭ spažyvańni ałkaholu. Ale žančyny nie tolki važać mieniej za mužčyn, ale ich arhanizmy taksama ŭtrymlivajuć mienš vady, jakaja razvodzić ałkahol. Pasprabujcie abmiežavać užyvańnie ałkaholu i pamiatajcie: zvyčajna, vam patrebna našmat mienš, čym vašamu mužu.
5. Šmat pieražyvańniaŭ i mała kłopatu pra siabie
Žančyny ŭdvaja čaściej za mužyčyn pakutujuć ad razładaŭ, źviazanych sa stresam. Taksama žančyny ŭ dva razy bolš schilnyja doŭhi čas utojvać pieržyvańni ad niaŭdałych adnosin. Dadaje niehatyvu i toj fakt, što šmat žančyn staviać patreby inšych vyšej za svaje. Ličycca, što častkova takija pavodziny mohuć vyklikacca asablivaściami žanočaj psichałohii, ale budzie karysna adsunuć pieražyvańni ab miułym i vydatkoŭvać bolš času na siabie, kab być bolš zdarovaj u budučyni.
Mužčyny
1. Złoŭžyvańnie ałkaholem
Biełarusy pjuć šmat, i heta samo saboj škodna dla zdaroŭja. Nie mienš škodnaj źjaŭlajecca i tradycyja biełarusaŭ užyvać vialikija kolkaści ałkaholu zapar. Abmiažujcie ŭžyvańnie ałkaholu da zdarovaha minimumu, i vy zaścieražacie siabie ad chutkaha naboru vahi i zachvorvańniaŭ
2. Ihnaravańnie miedycynskich abśledavańniaŭ i samaabśledavańniaŭ
Mužčyny ŭ siarednim žyvuć mienš za žančyn i ŭ mužčyn bolš šancaŭ pamierci ad raku. Razam z hetym mužčyny našmat čaściej ihnarujuć daktaroŭ. Mužčyny (u paraŭnańni z žančynami) taksama nie nadta lubiać pravodzić samaahlad. Pryčynami takich pavodzinaŭ moža być strach, nieŭvažlivaść ci abyjakavaść da zdaroŭja, ale rehularnyja miedycynskija abśledavańni dy samaabśledavańni ŭ šmatlikich vypadkach mohuć dapamahčy vyjavić zachvorvańnie na rańniaj stadyi. Banalna ahladajcie siabie čaściej, u tym liku i zzadu. I abmacvajcie svajo cieła, u tym liku tyja častki jaho, u jakich uźnikajuć niebiaśpiečnyja novaŭtvareńni.
3. Trymać usio ŭ sabie
Mužčyny časta zamykajucca ŭ sabie i nikomu nie raskazŭvajuć pra svaje prablemy i tryvohi, nie prosiać dapamohi i zmahajucca z napaściami samastojna. Miž tym, mužčyny na 50% čaściej za žančyn chvarejuć na depresiju i na 77% čaściej čyniać samahubstvy. Mužčyny z depresijaj u dva razy čaściej šukajuć vyjście ŭ ałkaholi, a hnieŭ, «zahnany» ŭ siabie, pavyšaje ryzyku infarktu.
4. Hrebavańnie asabistaj hihijenaj
Zhodna z daśledvańniami amierykanskich daśledčykaŭ, navat u samych raźvitych krainach adzin mužčyna z troch nie myje ruk paśla pachodu ŭ prybiralniu, a takoje źniavažlivaje staŭleńnie da zdaroŭja moža pryvieści da šmatlikich infiekcyjnych zachvorvańniaŭ. Taksama tolki 66% mužčyn čyściać zuby dva razy na dzień ci čaściej. Heta pahražaje nie tolki niepryjemnym pacham, karyjesam, ale i zachvorvańniami dziasnaŭ. Jany, ŭ svaju čarhu, mohuć pavyšać ryzyku sardečnych zachvorvańniaŭ i erektylnaj dysfunkcyi.
5. Častyja haračyja vanny
Paśla pracy pryjemna adpačyć u vańnie, poŭnaj haračaj vady. Ale častyja vanny lepš zamianić na duš, bo takija vodnyja pracedury mohuć paškodzić repraduktyŭnuju funkcyju: śpiermatazoidy hinuć u łaźni i haračaj vadzie.