CVK admoviŭ apazicyi ŭ praviadzieńni hramadskaha abmierkavańnia papravak u vybarčaje zakanadaŭstva
Centrvybarkam admoviŭ pradstaŭnikam šerahu biełaruskich palityčnych partyj i hramadskich abjadnańniaŭ pravieści hramadskaje abmierkavańnie prapanoŭ ab uniasieńni papravak u vybarčaje zakanadaŭstva. Pra heta BiełaPAN paviedamiŭ lidar Partyi BNF Alaksiej Janukievič.
U adkazie na prapanovu, padpisanuju kiraŭnikom CVK Lidzijaj Jarmošynaj, adznačajecca, što «prajekt narmatyŭnaha pravavoha akta moža być vyniesieny na publičnaje (usienarodnaje, hramadskaje ci prafiesijnaje) abmierkavańnie na padstavie rašeńnia dziaržaŭnaha orhana (słužbovaj asoby), upaŭnavažanaha prymać (vydavać) narmatyŭnyja pravavyja akty. U adpaviednaści z zakonam Centralnaja kamisija nie źjaŭlajecca takim orhanam».
Akramia taho, zajavili ŭ CVK, zakanadaŭstva Biełarusi nie praduhledžvaje praviadzieńnie ekśpiertyzy zakonaprajektaŭ BDIPČ ABSIE i Vieniecyjanskaj kamisijaj.
Zajava ab praviadzieńni hramadskaha abmierkavańnia papravak u vybarčaje zakanadaŭstva była padpisana Partyjaj BNF, Biełaruskaj partyjaj levych «Spraviadlivy śviet», Biełaruskajsacyjał-demakratyčnaj partyjaj (Hramada), Biełaruskaj partyjaj «Zialonyja», kampanijaj «Havary praŭdu!» i rucham «Za Svabodu».
Padpisanty zajavy ličać, što šerah vypracavanych CVK prapanoŭ «patrabujuć surjoznaha i hruntoŭnaha abmierkavańnia z zacikaŭlenymi bakami», a «metazhodnaść niekatorych z apublikavanych prapanoŭ vyklikaje surjoznyja sumnieńni».
U pryvatnaści, ličać jany, patrabujuć abmierkavańnia: prapanova ab nadańni prava vyłučeńnia kandydataŭ u deputaty respublikanskim hramadskim abjadnańniem z kolkaściu členaŭ nie mienš jak 1.000 čałaviek; admova ad dziaržaŭnaha finansavańnia raschodaŭ na pieradvybarnuju ahitacyju i pieravod jaje poŭnaściu na zabieśpiačeńnie za košt pieradvybarnych fondaŭ; ideja vyklučyć ahitacyju za niaŭdzieł u vybarach z katehoryi pieradvybarnaj ahitacyi.
Apazicyjnyja struktury prapanavali apublikavać u ŚMI tekst prapanoŭ ab uniasieńni źmienaŭ u Vybarčy kodeks; pravieści hramadskaje abmierkavańnie prapanoŭ, u tym liku praz arhanizacyju hramadskich słuchańniaŭ z udziełam dziaržaŭnych orhanaŭ, palityčnych partyj i respublikanskich hramadskich abjadnańniaŭ; nakiravać prapanovy na ekśpiertyzu ŭ BDIPČ ABSIE i Vieniecyjanskuju kamisiju Savieta Jeŭropy.
Pavodle słoŭ Janukieviča, admoŭny adkaz CVK nie staŭ niečakanym. «Ale dla nas było vielmi važna sfarmulavać svaju pazicyju i abvieścić jaje publična», — skazaŭ jon.
Pry hetym, paviedamiŭ palityk, demakratyčnyja arhanizacyi raspracavali svoj prajekt papravak u vybarčaje zakanadaŭstva, jaki budzie nieŭzabavie nakiravany ŭ dziaržaŭnyja orhany. «Viadoma, u nas niama iluzij, što našy papraŭki buduć zrobleny normami prava, nam važna, kab naša pazicyja była viadomaja biełaruskaj i mižnarodnaj hramadskaści», — adznačyŭ Janukievič.