U Rakavie stvarajuć chendmejd-posud u tradycyjach Radziviłaŭ

Vasil Rubcoŭ, zasnavalnik Rakaŭskaj tvorčaj majsterni «Isłač», adnaŭlaje šklarnyja tradycyi Radziviłaŭ, čyja Nalibockaja šklarnia była viadomaj na ŭsiu Reč Paspalituju.

Generation.bY zavitaŭ da adzinych u Biełarusi majstroŭ, jakija vyrablajuć šklany i kryštalovy chendmejd.

Rakaŭ — kultavaje miesca dla amataraŭ historyi biełaruskaj kultury: tut i muziej-halereja ŭnikalnaha mastaka Fieliksa Januškieviča, i nieahatyčny Maryinski kaścioł, i mienavita tut niekalki hadoŭ tamu majstar pa škle Vasil Rubcoŭ zasnavaŭ tvorčuju majsterniu «Isłač» akurat nasuprać doma mastaka i dudara Todara Kaškureviča. A niadaŭna Vasil z paplečnikami vyrabiŭ radziviłaŭskija kielichi, dakładna takija ž, ź jakich piŭ słavuty rod vino i starku (harełka z čystaha žytniovaha śpirtu) u XVIII stahodździ.

«Jak moža nie pryjści ideja vyrabić radziviłaŭskija kielichi, kali my tut pobač z Nalibockaj puščaj chodzim?! My prosta vyrašyli adnavić tutejšyja šklarnyja tradycyi», — kaža dyrektar majsterni Vasil Rubcoŭ.

Niepadalok ad Rakava ŭ Nalibokach vyrablałasia darahoje škło ŭ manufaktury Radziviłaŭ. Pabudavać šklarniu zahadała Hanna Radzivił u XVIII stahodździ i zaprasiła zamiežnych majstroŭ. Tut rabilisia kielichi, kubki dla samich Radziviłaŭ, pradukcyja taksama išła na prodaž za miažu. Nalibockija hutniki navat vyrablali łabaratornaje abstalavańnie dla Vilenskaj akademii.

Kielichi i kubki majstry skanstrujavali pa knihach i vyjavach z radziviłaŭskich ekspazicyj za miažoj.

«Rabić takija kielichi vielmi ciažka i vielmi doŭha. Kožnuju jamačku, kožnuju rysačku treba zrabić niekalki razoŭ, vyrazać, paliravać, sama forma robicca kolki času. Kab vyrabić niekalki takich kielichaŭ, patrebien miech z hrašyma. Tamu jany pakul nie pradajucca. My šukajem mahčymaść rabić ich pabolej, tym bolš što niekatorym heta cikava», — miarkuje Vasil.

Zasnavalnik i idejny natchnialnik «Isłačy», jaki z adukacyi inžynier-budaŭnik, Vasil Rubcoŭ paśpieŭ prapracavać juvieliram, vartaŭnikom i navat zajmaŭsia pieraprodažam MAZaŭ u haračyja 90-ja, a potym vyrašyŭ źjechać z rodnaha kraju ŭ Polšču ź siamjoj. Ale paśla zrazumieŭ, što na radzimie ŭsio tolki pačynajecca, i viarnuŭsia ŭ Minsk. I ŭ Karaleŭskim pałacy ŭ Varšavie ŭ svoj čas možna było nabyć vyraby biełaruskaha majstra. Ciapier Vasil zajmajecca škłom i kryštalom, kiruje ŭłasnaj majsterniaj, raspracoŭvaje dyzajn kiliškaŭ, bakałaŭ dy vazaŭ i razvažaje pra popyt na takija vyraby:

«Reč u tym, što biełaruskija čaraty mienš cikavyja, u razy lepiej raspradajecca kitajskaja tematyka. Taksama nie nadta pradajucca kielichi „Z Kaladami!“, chutčej biaruć „S Roždiestvom!“».

Pracaj majstroŭ užo zacikaviŭsia Fond Ahinskich, i, mahčyma, u budučyni źjaviacca kielichi i kubki, ź jakich piła siamja słavutaha kampazitara.

Kamientary da artykuła