Usiedarožnik rasijskaha bajkiera pajšoŭ pad lod na Niomanie
Siabry kiroŭcy katalisia pa lodzie na kvadracykłach, a jon vyrašyŭ dałučycca da ich na Toyota Land Cruiser.
Tak usio vyhladała da zdareńnia. Fota autogrodno.by.
Aŭto prajechała pa lodzie kala 15 m i pajšło pad lod. Kiroŭca paśpieŭ vybracca. Fota autogrodno.by.
Pazadarožnik z-pad lodu vyciahnuli vyratavalniki. Fota MNS.
Pazadarožnik z-pad lodu vyciahnuli vyratavalniki. Fota MNS.
Kala vioski Mikałajeŭščyna Staŭbcoŭskaha rajona hości turbazy «Vysoki bierah» z Rasii vyrašyli pakatacca pa lodzie na kvadracykłach. Da kampanii dałučyŭsia kiroŭca Toyota Land Cruiser. Jon prajechaŭ pa lodzie kala 15 m, paśla čaho pazadarožnik pajšoŭ pad lod. Haspadar paśpieŭ vybracca na bierah. Zatopleny aŭtamabil vyciahvali z-pad lodu ratavalniki.
Jak raskazali karespandentu «Našaj Nivie» ŭ turystyčna-azdaraŭlenčym kompleksie «Vysoki bierah», paciarpieły — udzielnik bajkierskaha źlotu z Sankt-Pieciarburha. «Jon užo źjechaŭ. Pahruziŭ na płatformu mašynu i źjechaŭ».
Administratar «Vysokaha bieraha» raspaviała, što da hetaha času padobnych incydentaŭ u ich nie było. Bajkierskija źloty ŭ ich pravodziacca na praciahu ŭžo niekalkich hadoŭ. Zvyčajna pryjazdžaje kala 130 čałaviek, zdymajuć ŭsie numary.
«Da bajkieraŭ pa-roznamu staviacca. Ale ŭ nas ź imi dobryja adnosiny, — kaža administratarka turbazy. — Jany ŭ nas fiestyvali rok-muzyki ładziać. Akramia taho, akazvajuć dapamohu dvum dziciačym damam — hrošy źbirajuć dla dziaciej, hrošy».
Kali mierkavać pa fotazdymkach supołki bajkierskaha źlotu ŭ «Vysoki bierah» va Ukantakcie, Nioman pryvablivaje haściej u lubuju paru hoda. Tak, u časie apošniaj sustrečy pry kancy vieraśnia 2012 hoda jany naładzili spabornictvy pa farsiravańni raki na kvadracykłach.